घड्याळ चिन्हाविषयी शरद पवार पुन्हा सर्वोच्च न्यायालयात

न्यायमूर्ती सूर्यकांत आणि न्या. के. व्ही. विश्वनाथन यांच्या खंडपीठाने अजित पवार गटाला १९ मार्चच्या न्यायालयाच्या आदेशानंतर किती जाहिराती प्रसिद्ध झाल्या हे दाखवा, असे सांगितले आहे. तसेच न्यायालयाच्या आदेशाचे उल्लंघन केल्यास कठोर कारवाई करण्यात येईल, असा इशाराही दिला आहे.सर्वोच्च न्यायालयात शरद पवार गटातर्फे वरिष्ठ वकील अभिषेक मनू सिंघवी यांनी युक्तीवाद केला. न्यायालयाने १९ मार्च रोजी अजित पवार यांना घड्याळ चिन्हाविषयी अतिशय स्पष्ट आदेश दिले होते. मात्र, अजित पवार यांच्याकडून या निर्देशांचे पालन करण्यात आलेले नसल्याचे त्यांनी न्यायालयाच्या निदर्शनास आणून दिले.