मानखुर्दमध्ये सहा वर्षांच्या चिमुकल्याचा खड्ड्यात पडून मृत्यू

मुंबई, दि.२२ : प्रतिनिधी मानखुर्द रेल्वे स्थानक जवळ मुंबई रेल्वे विकास कॉर्पोरेशनच्या कामासाठी खोदण्यात आलेल्या खड्ड्यात पडून एका सहा वर्षाच्या चिमुरड्याचा मृत्यू झाल्याची घटना घडली आहे. आयुष राजेश शेगोकार असे या दुर्देवी मृत्यू पावलेल्या चिमुरड्याचे नाव आहे. या प्रकरणी लोहमार्ग पोलिसांनी निष्काळजीपणाचा गुन्हा दाखल केला असून पुढील तपास पोलीस करत आहे. सोमवार दि.२२ रोजी सकाळी तो त्याच्या घरापासून जवळ मानखुर्द रेल्वे स्थानक लगत असलेल्या आणि पाण्यानी भरलेल्या खड्ड्याजवळ मित्रांसह खेळायला गेला होता. अचानक तो खड्डात पडला आणि बुडाला. तत्काळ खड्ड्यात बुडालेल्या आयुषला बाहेर काढले आणि पालिकेच्या शताब्दी रुग्णालयात दाखल केले. मात्र डॉक्टरांनी त्याला मृत घोषित केले.


यावेळी मानखुर्द रेल्वे स्थानकात उभ्या प्रवाश्यांनी हे दृश्य बघितले आणि त्या खड्ड्याकडे धाव घेतली. गर्दी झाल्यानंतर लोहमार्ग पोलिस देखील तिथे दाखल झाले. या प्रकरणी लोहमार्ग पोलिसांनी निष्काळजीपणाचा गुन्हा दाखल केला असून पुढील तपास पोलीस करत आहे. दरम्यान, मानखुर्द येथील स्थानकाच्या पुनर्विकासाचे काम यावर्षी एप्रिलमध्ये सुरू झाले होते. पुढील तपास पोलीस विभाग करत असून अहवालाची प्रतीक्षा आहे, अशी माहिती मुंबई रेल्वे विकास कॉर्पोरेशनच्या वरिष्ठ अधिकाऱयांनी दिली आहे.