उद्धव ठाकरे मुस्लीम मतांची स्पेस शोधतायंत?

१९८७ सालं, विलेपार्ल्यात पोटनिवडणुक जाहिर झाली होती. त्यावेळी शिवसेनेकडून रमेश प्रभू यांना उमेदवारी देण्यात आली होती. तेव्हा त्यांच्या प्रचार सभेसाठी आलेले बाळासाहेब ठाकरे म्हणाले होते की, आम्ही हिंदूंच्या रक्षणासाठी निवडणूक लढत आहोत. आम्हाला मुस्लिम मतांची पर्वा नाही. हा देश हिंदूंचा आहे आणि तो त्यांचाच राहणार' हे १९८७ ला प्रभू यांच्या प्रचार सभेतील हिंदूहद्यसम्राट बाळासाहेब ठाकरे यांचे शब्द होते. त्यावेळी शिक्षा म्हणून आयोगाने १९९५ ते २००१ पर्यत बाळासाहेबांचा मतदानाचा हक्क काढून घेतला होता. पण आता त्यातूनच 'शिवसेनाप्रमुखांनी हिंदुत्व सांगतांना इतर धर्मांचा द्वेष करा असं सांगितलं नाही' असं म्हणत उद्धव ठाकरे यांनी शिवसेनेच्या नव्या हिंदुत्वाची संकल्पना मांडलीय. तसेच मुस्लिम समुदाय आमच्या सोबत येत आहे असं ही ते म्हणत आहेत. अशावेळी मुस्लिम मतदार आमच्या पाठिंशी आहे, आणि मुस्लिम मतदार उद्धव ठाकरेंना खरा शिवसेनेचा नेता मानते, असे विधान उबाठा गटाचे प्रवक्ते संजय राऊत यांनी केली. त्यामुळे मुस्लिम मतदारांना आकर्षित करण्यासाठी उबाठा गटाने कसे प्रयत्न केले? ते प्रयत्न यशस्वी झाले का? मुस्लिम मतदारांना आपल्यासोबत जोडून घेण्यास उबाठा गट आग्रही का आहे?

 

शिवसेनेच्या स्थापनेनंतर पहिली दोन दशकं ती मराठी आणि स्थानिकांच्या आर्थिक प्रश्नांवर कार्यरत होती. त्यानंतर १९८५ ला रामजन्मभूमी आंदोलन सुरु झाल्यानंतर बाळासाहेबांनी हिंदूत्वाची भुमिका मांडली. मात्र, आता याचं बाळासाहेबांच्या हिंदूत्वाच्या विचारांशी फारकत घेत, उद्धव ठाकरेंनी हिंदूत्वाची नवी संकल्पना मांडली, ज्यात मुस्लिम मतदारांना आकर्षित करण्यासाठी अनेक प्रयत्न त्यांनी केले. मुळात भाजप-शिवसेना युतीवेळी ठाकरेंनी हिंदूत्वाच्या विचारांना तिलांजली दिली नव्हती. पंरतु महाविकास आघाडीच्या स्थापनेनंतर काँग्रेस आणि राष्ट्रवादी काँग्रेससह वेगळी चूल मांडल्यानंतर उद्धव ठाकरेंनी मुस्लिम मतदारांना आकर्षित करण्यासाठी विशेष प्रयत्न सुरु केलेत, अशी टीका त्यांचे राजकीय विरोधक करतात. त्यामुळे प्रश्न निर्माण होतो की, हिंदूत्वाचे राजकारण करणारे उबाठा गटप्रमुख उद्धव ठाकरे अचानक मुस्लिम मतदरांना आकर्षित का करत आहेत? मुळात शिवसेनेतील बंडानंतर मुळ शिवसैनिक शिंदेच्या बाजूने गेला. यांची प्रचिती ग्रामपंचायत निवडणुकीच्या निकालातून आलीच. अशावेळी उबाठा गटाने सर्वप्रथम दुरवलेल्या शिवसैनिकाला आपल्याकडे खेचण्यासाठी प्रयत्न केले. त्यात सुरुवातील संभाजी ब्रिगेडला सोबत घेण्याचा निर्णय मातोश्रीवर झाला. ज्यानंतर संभाजी ब्रिगेड आणि उबाठा गट संयुक्त मेळावे घेणार असं ठरलं होतं. त्यानंतर वंचित बहुजन आघाडीला महाविकास आघाडीत घेण्याचा प्रयत्न ही उद्धव ठाकरेंनी केला. त्यात आता आघाडीशी फारकत घेत, वंचितच्या प्रकाश आंबेडकरांना ठाकरेंच्या राजकीय विश्वासाहार्तेवर प्रश्न ही उपस्थित केला. या दोन्ही प्रयोगात अपयश आल्याने वंचित आणि अल्पसंख्याकांची मते मिळवण्यासाठी पुन्हा ठाकरेंनी वेगळे प्रयत्न सुरु केले, असा आरोप त्यांच्यावर केला जातोय.