अदानींच्या उर्जा प्रकल्पात अंबानींची गुंतवणूक ' इतके' टक्के भागभांडवल विकत घेतले!

 

मुंबई: रिलायन्स व अदानी समुह एकमेकांचे प्रतिस्पर्धी असले तरी गुंतवणूक करण्यात कोणतीही गल्लत करत नसल्याचे दिसून येत आहे. उद्योगपती मुकेश अंबानी यांनी अदानी समुहाच्या मध्यप्रदेश मधील उर्जा प्रकल्पातील २६ टक्के भागभांडवल विकत घेतले आहे. ५०० मेगावॉट वीज उर्जा प्रकल्पातील २६ टक्के हिस्सा अंबानी समुहाकडे असणार आहे. बाजारातील वृत्तानुसार रिलायन्स इंडस्ट्रीज अदानी समुहाची उपकंपनी महान एनर्जी लिमिटेड (Mahan Energy Limited) मधील ५ कोटी इक्विटी समभाग (शेअर्स) खरेदी करणार आहेत. या समभागाचे मूल्य एकूण ५० कोटी रुपये असल्याचे सांगितले जात आहे.

 

हूरून इंडियाने आपल्या अहवालात आशियाई खंडातील अब्जाधीशांची यादी जाहीर केली होती. या अहवालात प्रथम क्रमांक मुकेश अंबानी यांचा असून दुसरा क्रमांक गौतम अदानी यांनी पटकावला होता. तिसऱ्या क्रमांकावर पुनावाला कुटुंबांचे नाव जाहीर केले गेले होते.

 

दोन्ही उद्योगपती अंबानी व अदानी गुजरातचे असून अंबानीचे साम्राज्य तेल गॅसपासून टेलिकॉम मध्ये असून अदानी समुहाच्या अंतर्गत इन्फ्रास्ट्रक्चर,(मुलभूत सुविधा), कोळसा, खाणी, सीपोर्ट असे व्यवसाय आहेत.आतापर्यंत दोघांनाही आपापली क्षेत्र वेगवेगळी ठेवल्याने प्रत्यक्षात आपापसात व्यवहार केल्याचे ऐकिवात नाही.