आचारसंहितेचे उल्लंघन करणाऱ्यांवर तासाभरात होणार कारवाई!

 

 

मुंबई :    वारंवार सूचना करूनही अनेक ठिकाणी आदर्श आचारसंहितेचे पालन होताना दिसत नाही. त्यामुळे अशा प्रकारांना चाप लावण्यासाठी निवडणूक आयोगाकडून विशेष प्रणाली विकसित करण्यात आली आहे. त्याद्वारे १०० मिनिटांच्या आत संबंधितांवर कठोर कारवाई केली जाणार आहे.

आचारसंहिता कालावधीत काय करावे आणि काय करु नये याविषयी उमेदवार, प्रशासन आणि राजकीय पक्षांना माहिती दिली जाते. परंतु, काहीवेळेला या आदर्श आचारसंहितेचे उल्लंघन होते. त्याची तक्रार किंवा माहिती निवडणूक आयोग आणि जिल्हा प्रशासनापर्यंत पोहोचवण्यासाठी निवडणूक आयोगाने 'सीव्हिजिल ॲप' विकसित केले आहे. या मोबाईल ॲपद्वारे मतदारांना आता थेट आयोगाकडे तक्रार करता येणार आहे. या सीव्हिजिल ॲपवर तक्रार प्राप्त होताच तातडीने त्यावर कारवाई केली जाते. तक्रारदाराचे नाव गोपनीय ठेवले जाते.

हा सीव्हिजिल ॲप अँड्रॉइड आणि आयओएस डिव्हाइसवर डाऊनलोड करण्यासाठी उपलब्ध आहे. उल्लंघनाची तक्रार करण्यासाठी, वापरकर्त्यांनी फक्त ॲप उघडणे, उल्लंघनाचा प्रकार निवडणे आणि घटनेचे तपशिल, स्थान, वेळ आणि छायाचित्रे किंवा व्हिडिओ प्रदान करणे आवश्यक आहे. ॲप वापरकर्त्यांना त्यांच्या तक्रारींच्या प्रगतीचा मागोवा घेता येणार आहे.

 

या ॲप्लिकेशनचा वापर करून, निवडणूक निर्णय अधिकारी कार्यालयात न जाताही काही मिनिटांतच नागरिक राजकीय गैरव्यवहाराच्या घटनांची तक्रार नोंदवता येते. हा सीव्हिजिल ॲप जिल्हा नियंत्रण कक्ष, निवडणूक निर्णय अधिकारी आणि भरारी पथकाशी जागरूक नागरिकांना जोडतो. ज्यामुळे एक जलद आणि अचूक कृती, देखरेख आणि अहवाल प्रणाली तयार होते. या ॲपच्या अचूकतेसाठी ॲपमधून फक्त लाईव्ह लोकेशनवर आधारित फोटो, व्हिडिओ घेतले जातात. जेणेकरुन भरारी पथक, स्थिर संनिरीक्षण टीमला वेळेत कार्यवाही करणे शक्य होईल.