स्त्रीरोग आणि हॉमियोपॅथीचे योगदान (भाग-०४)

 

मासिक पाळीदरम्यान होणार्‍या पोटदाहाची अनेक कारणे असू शकतात. परंतु, ज्या स्त्रियांमध्ये कुठलेही विशेष कारण आढळून येत नाही, अशा स्त्रियांना वयोमानापरत्वे यातून आराम मिळतो, प्रसूतीनंतरही या दाहातून सुटका होते, असे दिसून आले आहे. परंतु, ज्या स्त्रियांमध्ये काहीना काही विशेष कारण आढळून येते, अशावेळी ते कारण जाणून घेऊन उपचार करणे फार गरजेचे असते.मासिक पाळीच्या दरम्यान, गर्भाशय आकुंचन पावत असते. आकुंचन-प्रसरणाची ही क्रिया गर्भाशयांतील आतील स्तर बाहेर टाकण्यासाठी असते. संप्रेरके सदृश्य काही द्रव्य यात सहभागी होतात याना ‘प्रोस्टाग्लँडीन्स’ असे म्हणतात. जेवढी या द्रव्याची मात्रा अधिक तेवढे गर्भाशयाचे आकुंचन-प्रसरण जोरात होते व पर्यायाने वेदना सुरू होतात. साधारणपणे या वेदनांची लक्षणे व चिन्हे आपण पाहूया. १) पोटात मुरडा येणे - ज्याप्रमाणे पायात गोळा येतो, त्याप्रमाणे पोटात अचानकपणे पिळवटल्यासारखे होते. दर काही मिनिटांना हे पिळवटणे चालू राहते, ओटीपोट दुखत राहाते.