पुणे - चक्क पाईपमध्ये केले धनेशाने घरटे; कारण...

मुंबई (विशेष प्रतिनिधी): पुणे जिल्ह्यातील विमाननगर परिसरामध्ये एका इमारतीच्या गॅलरीच्या भागात राखी धनेशाने (Grey Hornbill) आपले घरटे बनविले आहे. एसीसाठी किंवा पाण्याचा निचरा होण्यासाठी तयार करण्यात आलेल्या मानवनिर्मित पाईपचा आधार घेत राखी धनेश (Grey Hornbill) आपला निवारा शोधत आहेत. पुण्यातील स्थानिक वन्यजीव अभ्यासक आणि निरिक्षक स्वयम ठक्कर यांनी या राखी धनेशांचा (Grey Hornbill) व्हिडीओ कॅमेऱ्यात टिपला आहे.

गेल्या तीन वर्षांपासून राखी धनेशांच्या (Grey Hornbill) हालचालीचे स्वयम निरिक्षण करत असून वीणीच्या हंगामात आपले घरटे ते इथे बनवितात, असं निरिक्षण त्यांनी नोंदवले आहे. सामान्यपणे, वन्य अधिवासामध्ये असणाऱ्या राखी धनेशांचे (Grey Hornbill) झाडाच्या ढोलीत घरटे आढळते. फलाहारी असणारे हे पक्षी जोडीने आढळतात. नर आणि मादी एकत्रितपणे रहात असून विणीच्या वेळी मादी घरट्यात बसून राहते तर, नर हा मादी आणि पिल्लांसाठी खाद्य घेऊन येतो. विमाननगर परिसरातील या इमारतीच्या गॅलरीत दरवर्षी धनेश पक्ष्याची ही जोडी घरटे तयार करते. नैसर्गिक अधिवासात धनेश पक्षी एकच ढोलीत दरवर्षी आपले घरटे तयार करतात. दरवर्षी ढोली स्वच्छ करुन तिचा वापर करतात. विमाननगर परिसरातील धनेशाची जोडी देखील पाईपमधील पोकळी दरवर्षी स्वच्छ करते आणि त्यामध्ये पिल्लाला जन्म देते. 

 

हे पाहिलंत का?: Hornbills MahaMTB