अशोक सराफ आणि कलापिनी कोमकली यांना संगीत नाटक अकादमी पुरस्कार

 

मुंबई : संगीत नाटक अकादमीचे पुरस्कार नुकतेच जाहीर झाले. संगीत, नृत्य, नाट्य, रंगभूमी, पारंपारिक संगीत/नृत्य/नाट्य अशा अनेक प्रकारातून एकूण ९२ नावे निवडली गेली. या सर्वांना २०२३ सालचे संगीत नाटक अकादमीचे पुरस्कार जाहीर झाले आहेत. या पुरस्कारांच्या विजेत्यांच्या यादीत मराठी चित्रपटसृष्टीतील प्रसिद्ध अभिनेते अशोक सराफ आणि अभिनेत्री ऋतुजा बागवे यांचा समावेश आहे. तर संगीतासाठी कोमकली कलापिनी हिचाही समावेश आहे.

 

अशोक सराफ यांना नुकतेच महाराष्ट्र भूषण पुरस्कारानं गौरवण्यात आलं होतं, त्यानंतर आता त्यांना संगीत नाटक अकादमी पुरस्कार जाहीर झाला आहे. तसेच अभिनय क्षेत्रातच ऋतुजा बागवेला देखील संगीत नाटक अकादमी पुरस्कार जाहीर करण्यात आला आहे. लवकरच राष्ट्रपतींच्या हस्ते या पुरस्कारांचे वितरण करण्यात येईल.

 

संगीत नाटक अकादमीची स्थापना भारतीय शिक्षण मंत्रालयाने 31 मे 1952 रोजी केली. त्याच पुढील वर्षी त्याचे पहिले अध्यक्ष डॉ. पी. व्ही. राजमन्नर यांची नियुक्ती झाली. भारताचे पहिले राष्ट्रपती डॉ. राजेंद्र प्रसाद यांनी 28 जानेवारी 1953 रोजी संसद भवनात आयोजित एका विशेष कार्यक्रमात याचे उद्घाटन केले होते. या अकादमीने आजवर अनेक कलाकारांना व्यासपीठ मिळवून दिले. संगीत, नृत्य आणि नाट्य क्षेत्रातील अनेक कलावंत या अकादमीमुळे घडले व नावारूपास आले. अकादमीची फेलोशिप आणि पुरस्कार अतिशय प्रतिष्ठित मानले जातात.