सिडकोच्या नवी मुंबईतील घरांना अभूतपूर्व प्रतिसाद

नवी मुंबई, दि.२६ : विशेष प्रतिनिधी सिडको महामंडळाच्या “माझे पसंतीचे सिडकोचे घर”या महागृहनिर्माण योजनेला नागरिकांचा अभूतपूर्व प्रतिसाद मिळत असून एक महिन्याच्या कालावधीत ९२ हजारांहून अधिक अर्ज प्राप्त झाले आहेत. या गृहनिर्माण योजनेकरिता अधिकाधिक नागरिकांना अर्ज करता यावा याकरिता योजनेच्या ऑनलाइन अर्ज नोंदणीसही ११ डिसेंबरपर्यंत मुदतवाढ देण्यात आली आहे, अशी माहिती सिडको प्राधिकरणाने दिली आहे.

सिडकोतर्फे ११ ऑक्टोबर २०२४ रोजी “माझे पसंतीचे सिडकोचे घर” या महागृहनिर्माण योजनेचा प्रारंभ करण्यात येऊन सदर योजनेंतर्गत नवी मुंबईच्या वाशी, बामणडोंगरी, खारकोपर, खारघर, तळोजा, मानसरोवर, खांदेश्वर, पनवेल आणि कळंबोली नोडमध्ये प्रधानमंत्री आवास योजनेंतर्गत आर्थिकदृष्ट्या दुर्बल घटक व अल्प उत्पन्न गटाकरिता २६,००० सदनिका उपलब्ध करून देण्यात आल्या होत्या. अर्जदारांना आपल्या पसंतीची सदनिका निवडण्याचे स्वातंत्र्य हे या योजनेचे वैशिष्ट्य आहे. परवडणाऱ्या दरासह परिपूर्ण पायाभूत सुविधा, कनेक्टिव्हीटी, दर्जेदार बांधकाम आणि नवी मुंबईतील समृद्ध जीवनशैली अनुभवण्याची संधी या गृहनिर्माण योजनेद्वारे उपलब्ध करून देण्यात आली. अर्ज नोंदणीस मुदतवाढ देण्यात आल्याने अर्जदारांना उत्पन्न प्रमाणपत्र, रहिवास प्रमाणपत्र इ. आवश्यक त्या कागदपत्रांची जमवाजमव करण्यासाठीही पुरेसा अवधी मिळणार आहे.