ठाकरे गटाचे केदार दिघे यांच्यासह आठ जणांविरोधात अदखलपात्र गुन्हा

ठाणे : ठाण्याच्या कोपरी पाचपाखाडी मतदारसंघात मुख्यमंत्री एकनाथ शिंदे यांच्याविरोधात उभे ठाकलेल्या ठाकरे गटाच्या केदार दिघे ( Kedar Dighe ) यांच्यासह आठ जणांविरोधात कोपरी पोलीस ठाण्यात अदखलपात्र गुन्हा दाखल करण्यात आला आहे. कोपरीच्या अष्टविनायक चौकात पकडलेल्या वाहनात विदेशी मद्य आणि पैशांनी भरलेली २६ पाकिटे आढळल्याचे तक्रारीत नमुद आहे. दरम्यान, गाडीच्या तपासणीत काहीही आढळले नसताना जाणीवपूर्वक आपले नाव या प्रकरणात गोवल्याचा आरोप दिघे यांनी केला आहे.

कोपरी पाचपाखाडी मतदारसंघात मुख्यमंत्री एकनाथ शिंदे यांच्याविरोधात उबाठाचे केदार दिघे हे निवडणूक लढवत आहे. दिघे यांच्याविरोधात शिंदे गटातील एका महिला पदाधिकारीने कोपरी पोलीस ठाण्यात तक्रार दाखल केली आहे. या तक्रारीनुसार, बुधवारी मध्यरात्री पावणे दोन वाजण्याच्या सुमारास कोपरी येथील अष्टविनायक चौकात एका वाहनाची तपासणी केली. उबाठा गटाचे सचिन गोरिवले नामक कार्यकर्त्यांच्या या वाहनामध्ये मद्य आणि प्रत्येकी दोन हजार रुपये भरलेली २६ पाकिटे आढळली. या तक्रारीनुसार केदार दिघे यांच्यासह सचिन गोरिवले, प्रदीप शेंडगे, रविंद्र शिनलकर, प्रशांत जगदाळे, दत्ता पागवले, अनिता प्रभू, पांडुरंग दळवी, ब्रीद या कार्यकर्त्यावर कोपरी पोलिसांनी अदखलपात्र गुन्हा दाखल केला आहे.मात्र, केदार दिघे यांनी वाहनाच्या तपासणीचा व्हिडिओ जारी करून जाणीवपूूर्वक आपणास गोवल्याचे म्हटले आहे.