मुंबई : (Devendra Fadnavis)अमित ठाकरेंना पाठिंबा देणे, आता शक्य नाही, असे देवेंद्र फडणवीसांनी एका वृत्तपत्राला दिलेल्या मुलाखतीत वक्तव्य केले आहे. माहीम विधानसभा मतदारसंघातून महायुतीचे उमेदवार सदा सरवणकर, उबाठाचे महेश सावंत तर मनसेकडून अमित ठाकरे निवडणुकीच्या रिंगणात असल्याने माहीममध्ये तिहेरी लढत पाहायला मिळणार आहे.

 

मुलाखतीदरम्यान याविषयी प्रश्न विचारल्यावर देवेंद्र फडणवीसांनी सांगितले की, दादर-माहीम विधानसभा मतदारसंघात मनसेला आम्ही पाठिंबा देऊ, अशी आमची सुरुवातीला भावना होती. शिवाय मुख्यमंत्री एकनाथ शिंदे यांचेही यावर एकमत झाले होते. मात्र त्यांच्या पक्षातील आमदार असलेल्या उमेदवाराचे म्हणणे होते की जर आपण ही जागा लढलो नाही तर त्याचा फायदा अमित ठाकरे यांना होण्याऐवजी ठाकरे गटाच्या उमेदवाराला होईल, असे उपमुख्यमंत्री देवेंद्र फडणवीस सांगितले.

 

"त्यामुळे या सगळ्याचा दबाव मुख्यमंत्र्यांवर होता. अमित ठाकरे यांना पाठिंबा द्यायला हवा होता, या मताचा मी आजही आहे. मात्र आघाडी वा महायुतीमध्ये जो मुख्यमंत्र्यांचा निर्णय असतो, तोच आघाडी वा महायुतीचा असतो." असेही ते पुढे म्हणाले.