जितेंद्र आव्हाड यांचे वक्तव्य मुर्खपणाचे : उपमुख्यमंत्री देवेंद्र फडणवीस

पुणे येथे माध्यमांशी संवाद साधताना फडणवीस म्हणाले, प्रभू श्रीराम हे सर्वांचेच आहेत. ते बहुजनांचे, अभिजनांचे, आदिवासींचे, दलितांचे अशा सर्वांचेच आहेत. ते शाकाहारी होते की मांसाहारी, या विषयात पडण्याची गरज नाही. ज्यांची प्रभू श्रीरामावर श्रद्धा आहे, अशा लोकांच्या भावनाना दुखावण्याचे काम विनाकारण केले जात आहे. आमचे वारकरी, धारकरी, टाळकरी हे सर्व बहुजन असून, ते सर्व शाकाहारी आहेत, या सर्वांचा यातून अपमान नाही का झाला? विनाकारण विवाद निर्माण करून लोकांच्या भावना दुखावून राज्यात अशांतता निर्माण करण्याचे काम केले जात आहे, असेही देवेंद्र फडणवीस यांनी सांगितले.

 

जे लोक स्वतःला हिंदुत्ववादी म्हणत होते, त्यांनी याबाबत साधलेले मौन त्यांची बेगडी वृत्ती दाखवून देत आहे, असा टोला देवेंद्र फडणवीस यांनी उद्धव ठाकरेंना नाव न घेता लगावला.