विकसित भारत संकल्प यात्रेला मुंबईकरांचा उत्स्फूर्त प्रतिसाद

मुंबई : केंद्र आणि राज्य शासन पुरस्कृत योजनांचा सर्वसामान्य नागरिकांना लाभ व्हावा यासाठी केंद्र सरकारने सुरू केलेल्या ‘विकसित भारत संकल्प यात्रे’ला मुंबई महानगरात उत्तम प्रतिसाद मिळत आहे. दि. १५ नोव्हेंबर २०२३ पासून सुरू झालेली ही यात्रा आतापर्यंत लक्षावधी नागरिकांपर्यंत पोहोचली आहे. यात हजारोंच्या संख्येने लाभार्थ्यांना फायदा मिळाला आहे. दि. २६ जानेवारी २०२४ या कालावधीपर्यंत ही यात्रा सुरू राहणार आहे. आपल्या परिसरात येणाऱ्या या यात्रेचा नागरिकांनी लाभ घ्यावा, असे आवाहन बृहन्मुंबई महानगरपालिका प्रशासनाकडून करण्यात येत आहे.

केंद्र आणि राज्य शासनाच्या विविध योजना आहेत. या योजनांचा अनेकांना फायदा होतो. विविध शासकीय कार्यालयांमध्ये या योजनांची दालने असून, तेथूनही नागरिकांना लाभ मिळतो आहे. केंद्र शासनाने सुरू केलेल्या विकसित भारत संकल्प यात्रेद्वारे घरापर्यंत यंत्रणा पोहोचत असल्याने हजारो अतिरिक्त नागरिकांना विविध योजनांचा लाभ मिळाला आहे.

 

‘मेरी कहानी मेरी जुबानी’द्वारे अनेक लाभार्थी अनुभव कथन करीत आहेत. त्यातून महानगरपालिकेच्या पी उत्तर विभागात दि. १६ डिसेंबर २०२३ रोजी पार पडलेल्या कार्यक्रमात पंतप्रधान नरेंद्र मोदी यांनी कांदिवली-चारकोप येथील लाभार्थी मेघना गुरव यांच्याशी थेट संवाद साधला. श्रीमती गुरव यांना मुद्रा, पीएम स्वनिधी, स्वनिधी ते समृद्धी या योजनांचा लाभ मिळाला आहे.

महानगरपालिका क्षेत्रातील विविध योजनांसाठी पात्र असलेल्या परंतु लाभापासून वंचित असलेल्या घटकांपर्यंत केंद्र शासनाच्या योजनांची माहिती पोहोचविणे, त्याबाबत जागृती करणे, शासकीय योजनांच्या लाभार्थ्यांशी संवाद साधणे, निश्चित केलेल्या पात्रतेनुसार संभाव्य लाभार्थी यांची यात्रेमध्ये नोंदणी करणे आदी या यात्रेची उद्दिष्टे आहेत. या यात्रेदरम्यान विविध योजनांचे लाभार्थी या वाहनांना भेट देऊन थेट लाभ घेत आहेत.

- २ हजार ७३१ लाभार्थ्यांना स्वनिधी योजनेचा, तर ५०८४ लाथार्थ्यांना संकल्प योजनेचा लाभ

-आरोग्य तपासणी दालनांद्वारे आतापर्यंत २९ हजार ४४२ नागरिकांची तपासणी

-१५ हजार ३८३ गरजू नागरिकांना उज्ज्वला योजनेचा लाभ

- १६ हजार नागरिकांना आयुष्मान कार्ड वितरित

- बृहन्मुंबई महानगरपालिकेच्या २२७ प्रभागांमध्ये फिरताहेत चार विशेष वाहने

- २६ जानेवारी २०२४ पर्यंत सुरू राहणार यात्रा