खड्डे भरण्याचे काम तीन दिवसांत युद्ध पातळीवर पूर्ण करणार : आयुक्त डॉ. भाऊसाहेब दांगडे

कल्याण डोंबिवलीत सुरू असलेल्या खड्डे भरण्याच्या कामाच्या ठिकाणी अचानक भेट देत कामाच्या दर्जाची त्यांनी पाहणी केली. कल्याण डोंबिवलीत खड्डे भरण्याचे काम आधीही सुरूच होते. मात्र पावसाने उघडीप दिल्याने रविवार रात्रीपासून डांबर टाकून हे खड्डे भरण्याचे काम मोठ्या प्रमाणात केले जात आहे. त्यामुळे येत्या 3 दिवसांत कल्याण डोंबिवलीतील बहुतांश रस्ते हे खड्डेमुक्त होतील. शहरातील रस्ते खड्डेमुक्त झाल्याने गणपती बाप्पाचे आगमन सुकरपणे होईल असा विश्वास या पाहणीनंतर आयुक्त डॉ. दांगडे यांनी व्यक्त केला. या पाहणीवेळी कडोंमपाचे शहर अभियंता अर्जुन अहिरे, जनसंपर्क विभाग प्रमुख संजय जाधव, बांधकाम विभागाचे अभियंता जगदीश कोरे, उप अभियंता शाम सोनवणे आदी अधिकारी उपस्थित होते.

मुख्यालयात बसणाऱ्या उपायुक्तांना विनाकारण सुरक्षा रक्षक तैनात केल्याच्या तक्रारीवरही आयुक्तांनी यावेळी भाष्य केले. महापालिकेच्या सुरक्षा रक्षकांचा आढावा घेऊन ज्याठिकाणी आवश्यक असतील तिकडेच सुरक्षा रक्षक ठेवण्याची कार्यवाही केली जाईल असे आश्वासन डॉ. दांगडे यांनी यावेळी दिले. दरम्यान महापालिका आयुक्त डॉ भाऊसाहेब दांगडे यांनी दुर्गाडी येथील गणेश घाटाची पाहणी केली. व उपस्थित अधिकाऱ्यांना योग्य त्या सूचना केल्या.