आयएसआयच्या संपर्कात होता गौतम नवलखा! पाकिस्तानी एजंटला भेटण्यासाठी तीनदा केली अमेरिकावारी

 

मुंबई : माओवाद्यांशी संबंध ठेवल्याच्या आरोपांवरुन अटकेत असलेल्या गौतम नवलखाचे पाकिस्तानी गुप्तचर संस्थेशी संबंध असल्याचा आरोप एनआयएने केला आहे. आयएसआयचा एजंट सय्यद गुलाम नबी फई याच्याशी गौतम नवलखाचा संबंध असल्याचे एनआयएने विशेष न्यायालयात सांगितले आहे.

 

अमेरिकेतील टेरर फायनान्सिंग प्रकरणात फईला दोषी ठरवण्यात आले होते. नवलखाला जामीन देण्यास नकार देत विशेष न्यायालयाने आपल्या आदेशात म्हटले आहे की, नवलखाचे आयएसआय एजंटशी संबंध दिसून येत आहेत. विशेष एनआयए न्यायालयाचे न्यायाधीश राजेश कटारिया यांनी ६ एप्रिल रोजी नवीन युक्तिवाद ऐकल्यानंतर ६९ वर्षीय गौतम नवलखाला जामीन नाकारला.

 

नवलखा यांना ऑगस्ट २०१८ मध्ये अटक करण्यात आली होती आणि सुरुवातीला त्यांना नजरकैदेत ठेवण्यात आले होते. सर्वोच्च न्यायालयाच्या आदेशानंतर एप्रिल २०२० मध्ये त्यांना नवी मुंबईतील तळोजा कारागृहात हलवण्यात आले. नवलखा यांना ज्या प्रकरणात अटक करण्यात आली होती ते प्रकरण ३१ डिसेंबर २०१७ रोजी पुण्यात झालेल्या एल्गार परिषदेत केलेल्या कथित प्रक्षोभक भाषणाशी संबंधित आहे.

 

पुणे पोलिसांनी दिलेल्या माहितीनुसार, या भाषणांमुळे दुसऱ्या दिवशी कोरेगाव भीमा युद्ध स्मारकाच्या आसपासच्या परिसरात जातीय दंगली उसळल्या. नंतर या प्रकरणाचा तपास एनआयएने आपल्याकडे घेतला. एनआयएने आपल्या आरोपपत्रात म्हटले आहे की, नवलखाने काश्मिरी अमेरिकन कौन्सिल (केएसी) परिषदेला संबोधित करण्यासाठी तीनदा अमेरिकेला भेट दिली होती.

 

तो इमेलद्वारे गुलाम नबी फई याच्या संपर्कात होता. याशिवाय कधी-कधी दोघेही फोनवर बोलत असत. आयएसआय आणि पाकिस्तान सरकारकडून पैसे स्वीकारल्याच्या आरोपावरून गुलाम नबी फई याला जुलै २०११ मध्ये एफबीआयने अटक केली होती. नवलखाने गुलाम फई याच्या खटल्याचा खटला चालवणार्‍या अमेरिकन न्यायालयाच्या न्यायाधीशांनाही एक पत्र लिहिले होते. हे प्रथमदर्शनी नवलखा आणि सय्यद गुलाम नबी फई यांच्यातील संबंध दाखवते.