आशियाई क्रीडास्पर्धेत पुनिया, फोगाट यांना थेट प्रवेश
19 Jul 2023 19:05:44
नवी दिल्ली : आशियाई क्रिडास्पर्धेत बजरंग पुनिया आणि विनेश फोगाट यांना थेट प्रवेश देण्यात आला आहे. त्याविरोधात कुस्तीपटू विशाल कालीरमण आणि अंतिम पंघाल यांनी न्यायालयात जाण्याचा इशारा दिला आहे.
चीनमधील हांगझोऊ येथे सप्टेंबर महिन्यात आशियाई क्रिडास्पर्धांचे आयोजन करण्यात आले आहे. भारतीय ऑलिम्पिक संघटनेच्या तदर्थ समितीने मंगळवारी खाशाबा जाधव इनडोअर स्टेडियम येथे २२ आणि २३ जुलै रोजी चाचण्या घेण्याचा निर्णय घेतला आहे. यामध्ये विनेश फोगाट (५३ किलो वजनीगट) आणि बजरंग पुनिया (६५ किलो वजनीगट) सहभाग घेणार नाहीत. तदर्थ समितीने संघाच्या मुख्य प्रशिक्षकांच्या इच्छेविरुद्ध या दोघांनाही चाचणीशिवायच संघात स्थान दिले आहे. या निर्णयाविरोधात या दोन्ही वजन गटातील इतर कुस्तीपटूंमध्ये नाराजी निर्माण झाली आहे.
कुस्तीपटू अंतिम पंघाल हिने विनेश फोगाटला चाचणीशिवाय स्पर्धेत प्रवेश दिल्याविषयी नाराजी व्यक्त केली आहे. ती म्हणाली, गेल्या एक वर्षापासून सराव नसतानाही विनेशला आशियाई क्रीडा स्पर्धेसाठी थेट प्रवेश देण्यात आला आहे. आपण २०२२ सालच्या ज्युनियर वर्ल्ड चॅम्पियनशिपमध्ये सुवर्णपदक जिंकले आहे. राष्ट्रकूल क्रिडास्पर्धेच्या चाचण्यांमध्येही विनेशसोबतचा सामना ३ – ३ अशा बरोबरीत सोडविला होता. मात्र, त्यावेळीदेखील माझी फसवणूक करण्यात आली होती. विनेश फोगाटचा पराभव केवळ आपणच नव्हे, तर अन्य कुस्तीपटूही करू शकतात. विनेशने गेल्या वर्षभरात कोणतीही मोठी कामगिरी केली नाही. असे असतानाही त्याला कोणत्याही चाचणीशिवाय आशियाई क्रीडा स्पर्धेत पाठवले जात आहे. हा अत्यंत निराश करणारा निर्णय असल्याचे पंघाल हिने म्हटले आहे.
कुस्तीपटू विशाल कालीरमण यांनेदेखील निषेध व्यक्त केला आहे. तो म्हणाला, बजरंग पुनियाला कोणत्याही चाचण्यांशिवाय आशियाई क्रीडा स्पर्धेसाठी थेट प्रवेश देण्यात आला आहे. वर्षभरापासून ते आंदोलन करत आहेत, तर आम्ही सराव करत आहोत. आम्ही १५ वर्षांपासून सराव करत आहोत. त्यामुळे आम्हाला न्याय न मिळाल्यास न्यायालयात जाण्याचा मार्ग मोकळा असल्याचेही कालीरमण यांनी म्हटले आहे.
