’पिंक रिक्षा’ नाशिककरांच्या सेवेत ; ‘रोटरी क्लब’चा महिला सक्षमीकरणासाठी अनोखा उपक्रम

नाशिक : महिला सक्षमीकरणाला चालना देण्यासाठी आणि महिलांना एक पाऊल पुढे टाकण्यासाठी रोटरी क्लब ऑफ नाशिकने पुढाकार घेतला आहे. त्याचाच एक भाग म्हणून शहरातील दोन गरजू महिलांना पिंक रिक्षा वितरित करण्यात आल्या असून त्या नाशिककरांच्या सेवेत दाखल झाल्या आहेत. रोटरीच्या या उपक्रमामुळे खर्‍या अर्थाने महिला सक्षमीकरणाला बळकटी मिळाली आहे. ऐतिहासिक, धार्मिक, सांस्कृतिक, सामाजिक आणि औद्योगिक पार्श्वभूमी लाभलेल्या नाशिकमध्ये आता महिलांसाठी पिंक रिक्षा धावू लागल्याने सुरक्षित प्रवासाचा मार्ग अधिक सुकर झाला आहे.


मागील महिन्यातच शहरातील महिला लाभार्थी नीता सुभाष बागुल आणि शोभा लक्ष्मण पवार दोन गरजू महिलांना रोटरीचे प्रांतपाल डॉ. आनंद झुंजूनूवाला यांच्या हस्ते पिंक रिक्षांचे वितरण करण्यात आले होते. सामाजिक क्षेत्रात कार्य करणार्‍या रोटरी संस्थेच्या या समाजोपयोगी उपक्रमाचे नाशिककरांकडून स्वागत होत आहे. ‘रोटरी’चे अध्यक्ष प्रफुल बरडीया आणि सचिव ओमप्रकाश रावत यांच्या संकल्पनेतून उपक्रम साकारला.दरम्यान,आलेल्या अर्जांची पडताळणी आणि छाननी करून पात्र आणि गरजू महिलांची निवड विशेष समिती मार्फत करण्यात येईल.