समीर वानखेडेंचा पाय आणखी खोलात; अहवालात पत्नी क्रांती रेडकरचे नाव

मुंबई : आर्यन खान प्रकरणात एनसीबीचे माजी विभागीय संचालक चौकशीच्या फेऱ्यात अडकलेले पाहायला मिळत आहे. आर्यन खान प्रकरणासंबंधी त्यांच्यावर आरोप करण्यात आले आहेत. त्यातच आता समीर वानखेडेंची पत्नी क्रांती रेडकर हिचे नाव समोर आले आहे. एनसीबीचे अधिकारी ज्ञानेश्वर सिंह यांनी या प्रकरणी चौकशी केली. या चौकशीतून अनेक धक्कादायक खुलासे करण्यात आले आहेत. त्यामुळे समीर वानखेडेंचा पाय अधिक खोलात जाताना दिसत आहे.

ज्ञानेश्वर सिंह यांनी केलेल्या चौकशीअंती समीर वानखेडेंच्या संपत्तीचे तपशील हाती आले आहेत. एनसीबीने दाखल केलेल्या प्रतिज्ञापत्रात म्हटले आहे की, समीर वानखेडें हे सहावेळा परदेशात फिरायला गेले होते. त्यात पोर्तुगाल, आफ्रिका, मालदीव यासारख्या ट्रीप्सचा समावेश असल्याचे त्यात नमूद करण्यात आले आहे. या सर्व ट्रीप्सचा एकूण ८ लाखांच्या घरात असल्याचा दावा एनसीबीने प्रतिज्ञापत्राद्वारे केला आहे. तसेच इतक्या पैशांत या ट्रीपचा खर्च होऊ शकत नाही असा दावा एनसीबीने केला आहे. त्याच बरोबर समीर वानखेडेंसोबतच त्यांचा मित्र विरल राजन हादेखील परदेश दौऱ्यात असल्याचे म्हटले आहे. समीर वानखेडेंनी आपली चार घड्याळे राजन विरल याला विकली. त्या विक्रीतून मिळालेला ४ लाखांचा चेक हा पत्नी क्रांती रेडकर हिच्या नावे जमा करण्यात आला असे एनसीबीने म्हटले आहे.