‘डिजिटल भारता’च्या वाटचालीत ‘सायबर सुरक्षा’ महत्त्वाची

मुंबई : “एकीकडे भारताची वाटचाल ‘डिजिटल इंडिया’कडे होत असताना देशातील सायबर गुन्ह्यांचे प्रमाण विलक्षण वाढत आहे. लहान मुले, महिला तसेच सामाजिक व आर्थिक संस्थादेखील सायबर गुन्ह्यांचे शिकार होत आहेत. अशावेळी विद्यार्थी, युवा पिढी तसेच, पालकांनी सायबर गुन्ह्यांबाबत सजग व जागरूक असणे गरजेचे आहे. विद्यार्थ्यांचे ‘सायबर’ विश्व सुरक्षित ठेवणे केवळ पोलिसांचीच नव्हे, तर पालक, शिक्षक व एकूणच समाजाची जबाबदारी आहे,” असे प्रतिपादन राज्यपाल रमेश बैस यांनी रविवार,  केले.

 

मुंबई पोलीस सायबर शाखा व ‘इंडियन मर्चंट्स चेंबर’च्या (आयएमसी) महिला शाखेच्यावतीने शालेय विद्यार्थ्यांसाठी आयोजित ‘सायबर सेफ मुंबई’ पोस्टर स्पर्धेतील विजेत्या व उपविजेत्या विद्यार्थ्यांचा सत्कार राज्यपाल रमेश बैस यांच्या हस्ते रविवारी राजभवन येथे संपन्न झाला, त्यावेळी ते बोलत होते. राज्यपालांच्या हस्ते आदर्श गौतम, जितेंद्र प्रजापती, मारिया शेख, जहाविका मकवाना, प्रीत खोसला व उनेझा सय्यद या पोस्टर स्पर्धा विजेत्यांना तसेच, अन्य सहा उपविजेत्यांना ‘टॅब’ तसेच, पदक प्रदान करण्यात आले.

“आज ऑनलाईन फसवणूक मोठ्या प्रमाणावर होत आहे. पासवर्ड मागून खात्यातून परस्पर पैसे काढून घेण्याचे प्रकार वाढत आहेत. नोकरी, बक्षीस, विजेचे बिल भरण्याचे आमिष दाखवून फसवणूक केली जात आहे. महिला व लहान मुलांच्या शोषणाचेदेखील प्रकार घडत आहेत. गेल्यावर्षी देशात ’सायबर सुरक्षे’संबंधी १३.९१ लाख घटना घडल्याचे सांगण्यात आले. त्यामुळे शाळांमध्ये तसेच, महाविद्यालयांमध्ये ‘सायबर सुरक्षा’ या विषयावर व्याख्याने व जनजागृती झाली पाहिजे,” असे सांगताना “देशाची सार्वभौमता जशी महत्वाची तितकीच सायबर सार्वभौमतादेखील महत्वाची आहे. अश्यावेळी प्रत्येक व्यक्तीला ‘सायबर योद्धा’ बनावे लागेल,” असेही राज्यपालांनी सांगितले.

 

‘सायबर’ गुन्हे दररोज घडत आहेत. आज प्रत्येकाच्या परिचयाची कुणीतरी व्यक्ती ‘सायबर’ गुन्ह्यांची शिकार झालेली आढळते. मुंबईत पाच ‘सायबर’ पोलीस ठाणी आहेत आणि ९३ पोलीस ठाण्यांमध्ये ‘सायबर’ पोलीस कक्ष आहे, तरीदेखील ते अतिशय कमी पडत आहेत. ‘सायबर’ गुन्हे ही अतिशय गंभीर समस्या असून प्रत्येक नागरिकाने ‘सायबर सुरक्षे’बाबत जागरूक होणे आवश्यक आहे. ‘सायबर’ गुन्ह्यांवर नियंत्रण आणण्यासाठी मार्गदर्शक प्रणाली (एसओपी) आपण एक महिन्यात तयार करू.