सन्मान स्त्रीशक्तीचा

मित्रहो, दि. ८ मार्च हा दिवस वैश्विक स्तरावर ‘जागतिक महिला दिन’ म्हणून साजरा केला जातो. मागील काही वर्षांपासून अमेरिका, युरोप, ब्रिटन, जर्मनी, भारत या देशांमध्ये स्त्री-पुरुष समानता, स्त्रियांना मतदानाचा अधिकार बहाल करणे, पुरुषांच्या तुलनेत स्त्रियांना ‘वर्किंग हवर्स’ कमी देणे, वेतनवाढ, नोकरीच्या ठिकाणी महिलांना संरक्षण आदी मागण्यांसाठी विविध महिला संघटनांकडून आंदोलने झाली, मोर्चे निघाले. यातूनच महिलांच्या सन्मानासाठी अन् हक्कांसाठी सर्वानुमते दि. ८ मार्च हा दिवस ‘जागतिक महिला दिन’ म्हणून साजरा करण्याचे ठरले.


 १९७५ मध्ये संयुक्त राष्ट्र संघाने दि. ८ मार्च हा दिवस ‘जागतिक महिला दिन’ म्हणून साजरा करण्याचा निर्णय घेतला. या पार्श्वभूमीवर दरवर्षी जागतिक महिला दिनानिमित्त ‘थीम’ जाहीर केलं जातं. मागील वर्षी थीम होतठ ‘जेंडर इक्वालिटी टुडे ‘फॉर ए सस्टेनेबल टूमारो.’ जागतिक महिला दिनानिमित्त तयार करण्यात आलेल्या झेंड्यावर पर्लर, हिरवा, पांढरा हे तीन रंग असतात. ‘पर्लर’ हा रंग न्याय व गरिमाचं प्रतीक आहे. पांढरा रंग हा पावित्र्याचं प्रतीक, तर हिरवा रंग हा उमेदीचं प्रतीक आहे.हिंदवी स्वराज्याचे संस्थापक छत्रपती शिवाजी महाराज यांना लोकहितवादी व आदर्श राजा घडविण्यात आईसाहेब राजमाता जिजाऊ माँ साहेब यांनी अविश्रांत परिश्रम घेतलं. अर्थातच शिवबाला युद्धनीतीचे प्रशिक्षण देण्यापासून तर राज्याभिषेक करण्यापर्यंत ‘त्या’ आयुष्यभर झटल्या. अशा थोर मां जिजाऊंना जागतिक महिला दिनानिमित्त त्रिवार मानाचा मुजरा! १८५७च्या पहिल्या स्वातंत्र्य लढ्यात आपल्या असामान्य शौर्याने झाशीची राणी लक्ष्मीबाई या भारतीय इतिहासात अजरामर झाल्या.


आजच्या महिला दिनी पुण्यश्लोक अहिल्यादेवी होळकर यांची आठवण होणं क्रमप्राप्तच ठरते. वैधव्याच्या दुःखाने वा पुत्रशोकाने हतबल न होता मोठ्या धैर्याने पुण्यश्लोक अहिल्याबाई होळकर यांनी होळकरांचे तब्बल २८ वर्षे राज्य चालविले. प्रजाहितदक्ष राज्यकर्ती म्हणून रयतेत ओळख असलेल्या अहिल्याबाईंनी सर्वधर्मसमभाव या तत्त्वावर यशस्वीपणे होळकरांचा राज्यकारभार चालविला. पुण्यात भिडेंच्या वाड्यात दि. १ जानेवारी, १८४८ रोजी मुलींची शाळा सुरू करून स्त्रीशिक्षणाची मुहूर्तमेढ रोवणार्‍या सावित्रीबाई फुले या पारतंत्र्याच्या काळातल्या पहिल्या महिला शिक्षिका म्हटल्या गेल्या. आज त्यांच्या पुण्याईमुळे २१व्या शतकातल्या ‘सावित्रीच्या लेकी’ या सर्वच क्षेत्रांत आघाडी घेताना दिसत आहेत.

 

त्याचप्रमाणे क्रीडा क्षेत्रात देशाला नावलौकिक मिळवून देणार्‍या मेरी कोम, सायना नेहवाल, राही सरनोबत, सानिया मिर्झा आदी नवोदित क्रीडापटूंना महिला दिनाच्या शुभेच्छा. साहित्य-कला क्षेत्रात उल्लेखनीय कार्य केलेल्या दुर्गा भागवत, विजया वाड, अरूणा ढेरे, विजया राजाध्यक्ष आणि पत्रकारिता क्षेत्रात आपल्या प्रबळ लेखणीने समाजातील विविध जाती-धर्मातील लोकांच्या ज्वलंत प्रश्नांना वाचा फोडून त्यांना न्याय मिळवून देणार्‍या ज्येष्ठ पत्रकार महिलांना जागतिक महिला दिनाच्या हार्दिक शुभेच्छा.मित्रहो,२१ व्या शतकात भारतीय महिला आपल्या बुद्धिमत्तेच्या जोरावर विविध क्षेत्रात अग्रेसर होताना दिसत आहेत.त्यांच्या प्रगतीच्या आड येणं आता कोणालाही कदापि शक्य होणे नाही. कारण, त्यांच्या प्रगतीचा आलेख उत्तुंग शिखरावर पोहोचला आहे. स्त्री ही अबला नसून सबला आहे, हे तिने प्रत्यक्ष कृतीने सिद्ध करून दाखविले आहे. मुलींनी खूप खूप शिकावं अन् आपल्या स्वतःचा व राज्यासह देशाचा सर्वांगिण विकास साधण्यासाठी खारीचा वाटा उचलावा.तमाम सावित्रीच्या लेकींना जागतिक महिला दिनाच्या हार्दिक शुभेच्छा!

 

 

-रणवीरसिंह राजपूत