गोपीनाथ मुंडे यांचा सर्वात भव्य पुतळा नाशिकमध्ये!

 

लोकनेते स्व. गोपीनाथ मुंडे यांच्या बीड जिल्ह्यातील जन्मभूमीव्यतिरिक्त महाराष्ट्रात उभारण्यात आलेले हे विशेष स्मारक आहे. जिल्ह्यातील नांदूर शिंगोटे येथे भव्य तळ्यात स्मारक उभारण्यात आले. तळ्याला काँक्रिटचे ’अस्तर’ करुन आकर्षक सजावटीत मध्यभागी गोपीनाथ मुंडे यांचा 16 फुट उंच ब्राँझचा पूर्णाकृती पुतळा उभारण्यात आला आहे.स्मारकात हिरवेगार बगिचा, लहान मुलांसाठी खेळणी, ‘ग्रीन जिम’, ’जॉगिंग ट्रॅक’सह सजावट करण्यात आली आहेत. सरोवरात बोटिंगची सुविधा उपलब्ध होणार आहे. स्मारकाच्या लोकार्पण कार्यक्रमासाठी राज्यातील दिग्गज नेत्यांची हजेरी राहणार असून नाशिकमध्ये अर्धा डझन मंत्री उपस्थित राहणार आहेत.

महाराष्ट्राचे माजी उपमुख्यमंत्री लोकनेते स्व. गोपीनाथ मुंडे यांचा पूर्णाकृती पुतळा व अनुषंगिक विकासकामांसह सिन्नर तालुक्यातील नांदूर शिंगोटे येथे दोन एकरमध्ये ‘गोपीनाथ गड’ भव्य स्मारक उभारले आहे. केंद्रीय मंत्री नितीन गडकरी यांच्या हस्ते व मुख्यमंत्री एकनाथ शिंदे यांच्या अध्यक्षतेखाली, पालकमंत्री दादा भुसे, केंद्रीय आरोग्य राज्यमंत्री डॉ. भारती पवार, मंत्री राधाकृष्ण विखे-पाटील, माजी मंत्री छगन भुजबळ, बाळासाहेब थोरात, पंकजा मुंडे, खा. प्रीतम मुंडे आदी उपस्थित राहणार आहेत.

सिन्नर तालुक्यातील नांदूर शिंगोटे येथे जि. प. च्या अध्यक्ष शीतल सांगळे असताना गोपीनाथ मुंडे यांचे स्मारक व पूर्णाकृती पुतळा उभारण्यासाठी संकल्पना मांडळी गेली. दि. 11 एप्रिल 2018 रोजी माजी ग्रामविकासमंत्री पंकजा मुंडे यांच्या हस्ते भूमिपूजन करण्यात आले. ‘गोपीनाथ गड’ येथील तळ्याला आकर्षक रुप देण्यात आले आहे. कामासाठी दोन एकरच्या परिसरामध्ये 400 मोटरचा जॉगिंग ट्रॅक करण्यात आला. तळ्याच्या मध्यभागी गोपीनाथ मुंडे यांचा 26 फूट उंचीचा ब्रांझचा पूर्णाकृती पुतळा मुंबई येथील जे. जे. स्कूल ऑफ आर्टमधील विजय बोनदर यांनी तयार केला आहे. परिसराचे सुशोभीकरण सुशांत पाटील यांनी केले. संपूर्ण परिसरावर ‘सीसीटीव्ही’ कॅमेर्‍यांद्वारे सुरक्षा नजर राहणार आहे. सौरऊर्जेवरील 85 ’एलईडी’दिव्यांची आकर्षक रोषणाई परिसर उजळवत आहे.