“माझ्या लग्नाला सासरकडून होता विरोध”, कुशल बद्रिकेच्या 'त्या' पोस्टने वेधलं लक्ष

 

 

मुंबई : एकांकिकांपासून सुरु झालेला अभिनयाचा प्रवास कुशल बद्रिके याला मालिका आणि चित्रपटांपर्यंत घेऊन आला. आजवर कुशलने त्याच्या विनोदी अभिनयाने प्रेक्षकांचे पुरेपुर मनोरंजन केले. सध्या तो चला हवा येऊ द्या या कार्यक्रमामुळे विशेष चर्चेत आहे. याशिवाय त्याने नुकतीच इन्स्टाग्रामवर केलेली पोस्ट देखील लोकांचे लक्ष वेधून घेणारी आहे. यात त्याने त्याच्या सासरच्या मंडळींबद्दल काही खुलासे केले आहेत.

 

कुशलने स्वतःचे काही फोटो शेअर करत सत्यघटनेवर आधारित पोस्ट लिहिली आहे. त्याने लिहिले आहे की, “ही पोस्ट सत्य घटनेवर आधारित आहे. माझ्या लग्नाला तसा माझ्या सासरकडून कडकडून विरोध होता. मला कायम असं वाटत राहील की माझं दिसणं हेच त्याला कारणीभूत असेल. आता हे फोटोज हाती लागेपर्यंत मी याच ‘गैर समजुतीत’ होतो.” हे फोटोज मला मिळाले त्या क्षणी मी सुनयनाकडे तडक गेलो आणि फोटो दाखवून तिला म्हणालो, ‘या मुलाला तुम्ही नाकारलं होतं, या अशा दिसणाऱ्या मुलाला नाकारण्याची तुमची हिंमत झालीच कशी?’ सुनयना मला शांतपणे म्हणाली, ‘तू अजूनही तसाच दिसतोस, हल्ली कॅमेरे बऱ्या क्वालिटीचे आलेत.’ मग मी आरशात एकदा स्वतःला पाहिलं आणि माझा ‘गैरसमज’ संपूर्ण दूर झाला. खरंच… टेक्नोलॉजी काय डेव्हलप झाली आहे यार, कॅमेरे चांगले आलेत बाजारामधे. (सुकून), @sanjaymandre तुझा कडचा ? camera भारी आहे .” असं कुशलने लिहीले आहे.

 

 

 

 

अभिनेते विजू माने यांनी एका युट्यूब चॅनलला दिलेल्या मुलाखतीत कुशलच्या दातांचा किस्सा सांगितला आहे. विजू म्हणाले, “मला कुशल बद्रिके हा अभिनेता म्हणून आवडायचा. मी एका स्पर्धेत एकांकिका बसवली होती. त्यात कुशल होता. यात त्याचा पहिला प्रवेश अगदी अडीच मिनिटांचा होता. या अडीच मिनिटात प्रवेशात कुशलने उजव्या विंगमधून एक्झिट घेतली आणि त्या विंगेतून त्या धावत यायचं होतं. तो जेव्हा धावत आला तेव्हा त्याच्या खांद्यावर रुमाल होता. प्रयोग सुरु असताना चौथ्या पाचव्या मिनिटाला लक्षात आलं की कायतरी गडबड आहे. त्याच्या खांद्यावर रुमाल लाल होत चाललाय, असं मला जाणवलं. त्यावेळी आमच्या गडकरी नाट्यगृहाच्या मागे एक गोल खांब होता.

 

कुशलने तिथे एंट्री केली, तेव्हा तो खांब्यावर आदळला आणि त्याचे पुढचे दोन्ही दात तुटले. ते दोन दात तिथे पडलेले होते. त्याच रक्त वाहत असलेल्या अवस्थेत कुशलने रुमाल घेऊन संपूर्ण एकांकिका केली. त्यावेळी तेच पंच, स्किट आणि त्याला झालेली दुखापत कोणालाही कळली नाही. पुढची ४० मिनिटे त्याने ती एकांकिका केली. त्याचे पहिले दोन्ही दात खोटे आहेत.

त्याचा रुमाल संपूर्ण रक्ताने भरला होता. त्याने प्रेक्षकांना जाणवूच दिलं नाही. एकाही प्रेक्षकाला कळलं नाही. त्यावेळी मग मला तो मुलगा चांगला आहे, असं वाटलं. त्यानंतर मग मी गोजिरी चित्रपटासाठी कुशलची निवड केली. हा चित्रपट झाला आणि नंतर मग कुशललाही चांगली काम मिळायला लागली”.

 

त्यानंतर मी एकदा जेवायला गेलो होतो, त्या हॉटेलच्या मार्केटिंग टीममध्ये मला कुशल दिसला. तो टाय, सूट, बूट घालून उभा होता. यानंतर मी तिथे गेलो, त्याला काय विचारलं. तर त्याने माझे सिनीअर आहेत, असे सांगितले. दुसऱ्या दिवशी मी त्याला घरी बोलवले आणि याबद्दल विचारले. त्यावेळी त्याला पहिला टाय काढ असे सांगितले. त्यावेळी तो म्हणाला, दादा नोकरी करावी लागेल. यात माझं काही भागत नाही. लग्न करायचं. तिच्या वडिलांना मी अमुक अमुक रक्कम आणून देईन असं सांगितलंय. यानंतर मग मी त्याला तू तुझे सिनेसृष्टीतील करिअर सुरु ठेव. तुला दर महिन्यात जी काही रक्कम लागेल ती मी तुला देत जाईन, असे सांगितले. यानंतर मग आमची मैत्री झाली. आता तर तो मला माझ्या भावासारखाच आहे”.