विकसित भारताच्या अमृतकालात सहकार क्षेत्राचे योगदान महत्त्वाचे – नरेंद्रसिंह तोमर

नवी दिल्ली : विकसित भारताचे स्वप्न साकार करण्यासाठी अमृतकालामध्ये सहकार क्षेत्राचे योगदान महत्त्वाचे आहे. सहकार क्षेत्राने देशासमोरील आव्हाने स्वीकारून पंतप्रधान नरेंद्र मोदी यांच्या आवाहनानुसार भारताला विकसित राष्ट्र बनवण्यासाठी सक्रिय योगदान द्यावे, असे आवाहन केंद्रीय कृषीमंत्री नरेंद्रसिंह तोमर यांनी शनिवारी दिल्ली येथे केले.

सहकार भारती ही सहकार क्षेत्रात काम करणाऱ्या प्रतिनिधींची सक्षम आणि सशक्त प्रतिनिधी संघटना आहे. सहकार क्षेत्र हे प्रामुख्याने ग्रामीण भागाशी निगडीत असून शेतकऱ्यांशी त्याचा जवळचा संबंध येतो. शेतकऱ्याला सर्व काही सहज आणि प्रामाणिकपणे उपलब्ध करून देण्यात आणि त्याच्या अडचणी कमी करण्यात सहकार क्षेत्राचे योगदान महत्त्वाचे ठरणार आहे, त्यासाठी सहकारी पतसंस्था महत्त्वाच्या ठरतील, असेही ते म्हणाले.

सहकार मंत्रालय देशभरातील सहकारी संस्थांच्या हितासाठी कटिबद्ध असून सातत्याने कार्यात व्यस्त आहे.माननीय पंतप्रधानांच्या मार्गदर्शनाखाली व सहकार मंत्र्यांच्या नेतृत्वाखाली सहकार मंत्रालय सहकारातून आता समृद्धीचा प्रवास सुरू केला आहे, असे प्रतिपादन सहकार राज्यमंत्री बी. एल. वर्मा यांनी केले.