मध्य प्रदेशात ७१% आणि छत्तीसगडमध्ये ६८ % मतदान, ३ डिसेंबरला लागणार निकाल!

नवी दिल्ली : छत्तीसगड आणि मध्य प्रदेशमधील विधानसभा निवडणुकीसाठी दि. १७ नोव्हेंबर रोजी मतदान पार पडले. मध्य प्रदेशात विधानसभेच्या सर्व २३० जागांवर मतदान झाले, तर छत्तीसगडमध्ये दुसऱ्या फेरीत ७० विधानसभा जागांवर मतदान झाले. सायंकाळी ५ वाजेपर्यंतच्या मतदानाच्या आकडेवारीनुसार मध्य प्रदेशात ७१.१६ टक्के तर छत्तीसगडमध्ये ६८.१५ टक्के मतदान झाले.

मध्य प्रदेशातील सर्व २३० विधानसभा जागांसाठी २,५३३ उमेदवार रिंगणात होते. त्याचवेळी, छत्तीसगडमध्ये दुसऱ्या टप्प्यात ७० जागांसाठी ९५८ उमेदवारांनी नशीब आजमावले. आता ३ डिसेंबर २०२३ रोजी होणाऱ्या मतमोजणीने सर्वांचे भवितव्य ठरणार आहे.मध्य प्रदेशमध्ये मुख्य निवडणूक अधिकारी अनुपम रंजन यांनी सांगितले की, रतलामच्या सैलाना विधानसभा मतदारसंघात सर्वाधिक ८५.४९ टक्के मतदान झाले. खिलचीपूर राजगढमध्ये ८४.१७ टक्के मतदान झाल्याचे त्यांनी सांगितले. त्याचवेळी सिवनी येथील बरघाट विधानसभा मतदारसंघात ८४.१६ टक्के मतदारांनी मतदान केले. त्याच वेळी, भिंडमध्ये सर्वात कमी ५०.४१ टक्के आणि दक्षिण ग्वाल्हेरमध्ये ५१.०५ टक्के मतदान झाले.

निवडणूक आयोगाच्या आकडेवारीनुसार, छत्तीसगडमधील विधानसभा निवडणुकीच्या दुसऱ्या टप्प्यातील ७० जागांवर मतदानाची टक्केवारी ६८ पेक्षा जास्त होती. नक्षलग्रस्त बिंद्रनवगढ येथील गरीबीबंद मतदारसंघातील नऊ मतदान केंद्रावरील मतदानाचे काम तीन वाजता संपले. त्याचवेळी उर्वरित ६९ जागांसाठी सायंकाळी ५ वाजेपर्यंत मतदान झाले.सायंकाळी ५ वाजेपर्यंत अधिकृतरित्या ६७.४८ टक्के मतदान झाले होते. हा आकडा थोडा वाढू शकतो, कारण काही लोक संध्याकाळी ५ नंतरही मतदानासाठी रांगेत होते. दुसऱ्या टप्प्यासाठी छत्तीसगडमध्ये १८,८३३ मतदान केंद्रे तयार करण्यात आली आहेत.