धनगर आरक्षणासाठी पडळकर आक्रमक! थेट मुख्यमंत्र्यांना इशारा

 

 

 

 मुंबई : ओबीसी आरक्षणापाठोपाठ आता धनगर आरक्षणासाठी आमदार गोपीचंद पडळकर यांनी आक्रमक भुमिका घेतली आहे. आपण योग्य पावलं उचलावीत अन्यथा धनगरांच्या आंदोलनाला सामोरं जाण्याची तयारी ठेवावी. असा इशाराच पडळकरांनी मुख्यमंत्री एकनाथ शिंदेंना दिला आहे. धनगर आरक्षण अंमलबजावणीसाठी शासनाने ५० दिवस दिले होते. आज ही मुदत संपली आहे. याकरिता पडळकरांनी मुख्यमंत्र्यांना थेट इशाराच दिला आहे.

 

 

 

गोपीचंद पडळकर म्हणाले, " फक्त विशिष्ट समाजासाठी आपली वाट्टेल ते करायची तयारी आहे, अशी धारणा बहुजन समाजात तयार होत आहे. एकनाथ शिंदे साहेब आपण राज्याचे मुख्यमंत्री आहात. आपली ओळख संवेदनशील नेता अशी आहे. तरी, तुम्हाला राजधर्माची आठवण करुन देण्याची वेळ माझ्यावर आली. आपण मुख्यमंत्री पदाची शपथ घेतली. त्यात सर्वांसाठी सर्वसमावेशक नेतृत्त्व करणार असल्याची प्रतिज्ञा होती. धनगर समाजाच्या आरक्षण अंमलबाजवणीसाठी शासनाने ५० दिवस दिले होते. आज ही मुदत संपली आहे. तरी या मुद्द्यावर शाकीय पातळ्यांवर काहीही ठोस हलचाल दिसत नाही. त्यामुळे आपण फक्त विशिष्ट समाजासाठी तत्परता दाखवत असल्याची धारण बहुजन समाजात तयार होत आहे."

 

"आघाडी सरकारने आरक्षण नाकारुन धनगर जमातीवर अन्याय केला.आमच्या आठही मागण्यांची अंमलबाजवणीची तात्काळ गरज आहे. समित्या गठित करुन धनगर समाजाच्या पदरात यातून काहीही पडणार नाही. ही भावना सामान्य धनगरांच्या मनात निर्माण होते आहे. आपण वेळीत योग्य पावलं उचलावीत. धनगर आरक्षणाचा मुद्दा निकालात काढावा. अन्यथा धगनर समाजाच्या संविधानिक प्रतिक्रियेला व आंदोलनाच्या रोषाला सामोरं जाण्याची तयारी ठेवावी. हा इशारा राज्यातील तमाम ५ कोटी धनगर समाजाच्यावतीने मी तुम्हाला देतो आहे." असं पडळकर यांनी म्हटले आहे.