कळवा रुग्णालय मृत्युतांडव प्रकरणी कारवाई होणार

ठाणे : कळवा येथील छत्रपती शिवाजी महाराज रुग्णालयात झालेल्या मृत्यूतांडव प्रकरणात नेमलेल्या चौकशी समितीकडुन शासनाला सादर केलेल्या अहवालात कुणावरही ठपका न ठेवल्याने आमदार संजय केळकर यांनी संताप व्यक्त केला आहे. तसेच, रुग्णसेवेत होत असलेल्या हेळसांड प्रकरणी आ. केळकर यांनी आयुक्तांची भेट घेऊन जाब विचारला. त्यावर आयुक्त अभिजीत बांगर यांनी याप्रकरणी निश्चितच कारवाई होणार असल्याचा निर्वाळा दिल्याचे आ. केळकर यांनी सांगितले.

कळवा येथील छत्रपती शिवाजी महाराज रुग्णालयात १२ ऑगस्ट रोजी एकाच दिवशी झालेल्या १८ रुग्णांच्या मृत्यू प्रकरणात मुख्यमंत्री एकनाथ शिंदे यांनी नऊ जणांची चौकशी समिती नेमली होती. ही घटना घडल्यानंतर १५ दिवसांनी चौकशी समिती आपला अहवाल सादर करेल असे स्वतः मुख्यमंत्र्यांनीच पत्रकार परिषद घेऊन जाहीर केले होते. या प्रकरणाची चौकशी करीत असताना रुग्णालयातील महत्वाची कागदपत्रे ताब्यात घेण्यापासून ते डॉक्टर्स, नर्स, मृतांचे नातेवाईक, अशा सर्वांचे जबाब समितीच्या वतीने नोंदवण्यात आले होते. मात्र, हा अहवाल सादर करण्यास चौकशी समितीला बराच विलंब लागला. दोन वेळा मुदत उलटूनही समितीने अहवाल सादर केला नव्हता.