झारखंडमध्ये 'शौर्य जागरण यात्रे'वरून परतणाऱ्या भाविकांवर मशिदीजवळ दगडफेक!

रांची : झारखंडमधील हजारीबागमध्ये दगडफेक झाल्याची घटना समोर आली आहे. पेलावल भागात राज्याची राजधानी रांचीमध्ये आयोजित 'शौर्य जागरण यात्रे'वरून परतणाऱ्या कार्यकर्त्यांवर दगडफेक करण्यात आली. तर एका महिलेसह १० जण जखमी झाले आहेत. दि. ८ ऑक्टोबर २०२३ रोजी रात्री ९.४५ च्या सुमारास एका मशिदीजवळ ही घटना घडली. स्थानिक पोलीस अधीक्षक (एसपी) म्हणतात की,या प्रकरणाचा तपास केला जात आहे आणि त्या आधारे अटक केली जाईल.

एका वृत्तसंस्थेने दिलेल्या माहितीनुसार, दगडफेक करणार्‍या समाजातील लोकांचे म्हणणे आहे की, हिंदू भाविकांची बस मशिदीसमोर थांबली होती आणि तेथे धार्मिक घोषणाबाजी करण्यात आली होती. पोलीस वेळेवर घटनास्थळी पोहोचले, त्यामुळे मोठी घटना टळल्याचा दावा एसपींनी केला. हिंसाचार करणाऱ्या लोकांचा पोलिसांनी पाठलाग केला, त्यानंतर बस गंतव्यस्थानाकडे रवाना करण्यात आली. दगडफेक करणाऱ्यांची ओळख पटल्याचे पोलिसांचे म्हणणे आहे.

शिवाय त्यांच्यावर लवकरच कारवाई करण्याचे आश्वासनही देण्यात आले आहे. जानेवारी २०२४ मध्ये राम मंदिराचे उद्घाटन होणार आहे आणि त्यासाठी देशातील लाखो गावांमध्ये धार्मिक कार्यक्रम आयोजित करण्याची योजना सुरू आहे. ‘विश्व हिंदू परिषदे’ची युवा शाखा ‘बजरंग दला'ने रांचीमध्ये ‘शौर्य जागरण’ नावाने ४ यात्रा काढल्या आहेत. या यात्रांमध्ये हजारो लोक सहभागी झाले होते. या घटनेनंतर 'झारखंड मानवाधिकार महासभे'ने पोलिसांना या रॅलींवर कडक नजर ठेवण्याचे आवाहन केले आहे.