‘ऐसा कोई सगा नहीं...!’

‘ऐसा कोई सगा नहीं नीतीशने जिसको ठगा नहीं।’ होय...हे खरयं. बिहारच्या राजकारणात स्वतःला विकासपुरूष म्हणून मिरवून घेणार्‍या नितीश कुमार यांनी धोका दिलेल्या लोकांची यादी खूप मोठी आहे. आधी देवीलालनंतर लालूप्रसाद यादव, रामविलास पासवान, जॉर्ज फर्नांडिस, शरद यादव आणि मागे भाजपसोबतही त्यांनी दगाबाजी केली. नुकतेच भाजपत येण्याच्या प्रश्नावर त्यांना विचारले असता त्यांनी मी मरेन, पण भाजपसोबत जाणार नाही, असे म्हटले. माझ्यासोबत सरकारमध्ये असताना लालू आणि तेजस्वी यांना गोवण्याचे काम भाजपने केल्याचे नितीश यांनी बोलून दाखवले. आता तेजस्वी आमच्यासोबत आहे, त्यांना हटवण्यासाठी भाजप पुन्हा त्यांना अडकवण्याचे काम करत आहे. भाजप आता जुना भाजप राहिला नसल्याचेही नितीश म्हणाले. नितीशबाबूच्या कोलांटउड्यांची नोंद ठेवली, तर एखादा जागतिक विक्रम त्यांच्या नावावर झाला असता. परंतु, विस्मरणाची सवय फार वाईट. तुम्ही मातीत मिसळून जाल. पण, भाजपसोबत जाणार नाही, असे म्हणणारे नितीश भाजपसोबत गेले आणि सत्तेत आले. विशेष म्हणजे भाजपचे जास्त आमदार निवडून येऊनही भाजपने मित्रधर्म निभावत नितीश यांना मुख्यमंत्री केले. परंतु, शब्दाला जागतील ते नितीश कसले. ते नंतर पुन्हा लालू यादवांचे सुपुत्र तेजस्वी यादवला सोबत घेऊन पुन्हा मुख्यमंत्री झाले. आधी त्यांना राजद म्हणजे जंगलराजची आठवण यायची. परंतु, भाजपशी दगाबाजी करून ती आठवणही ते विसरले. भाजप प्रदेश कार्यकारीणीत बिहारचे भाजप प्रभारी विनोद तावडे यांनीही नितीशसोबत युती करणार नसल्याचे स्पष्ट केले. नितीश यांच्या कोलांटउडीनंतर बिहारमध्ये सगळ काही आलबेल आहे, असे नाही. बिहारमध्ये महापुरुषांच्या प्रतिमा आणि महत्त्वाच्या धार्मिक ग्रंथांवर हल्ले होत आहेत. दरम्यान, नितीश यांना ‘जेडीयू’च्या संसदीय मंडळाचे राष्ट्रीय अध्यक्ष उपेंद्र कुशवाह, माजी राष्ट्रीय अध्यक्ष आरसीपी सिंह आणि माजी राष्ट्रीय उपाध्यक्ष प्रशांत किशोर यांनीही सोडचिठ्ठी दिली. नितीश यांनी कुशवाह यांच्यासोबत 35 तर आरसीपी सिंह यांच्यासोबत 22-23 वर्ष काम केले. परंतु, तरीही त्यांनी साथ सोडली. सत्ता व खुर्चीसाठी नितीश यांनी तत्व आणि विचारधारेला वारंवार तिलांजली दिली. सध्या ते मुख्यमंत्री असले तरीही त्यांचे राजकारण त्यांनी स्वतः संपवले. कारण, भविष्यात लालूपुत्राचे मन सांभाळावे लागेल आणि भाजपची दारं काय म्हणून ठोठावणार?