श्री शिवाजी शिक्षण संस्थेच्या निवडणुकीत हर्षवर्धन देशमुख यांची अध्यक्षपदी निवड!
Total Views |
अमरावती: राज्यातील दुसऱ्या क्रमांकाची संस्था म्हणून लौकिक असलेल्या श्री शिवाजी शिक्षण संस्थेच्या अध्यक्षपदी हर्षवर्धन देशमुख यांची फेरनिवड झाली आहे. ११ सप्टेंबर रोजी पार पडलेल्या या निवडणुकीत ७७४ पैकी ६७२ जणांनी मतदानाचा हक्क बजावला. नऊ सदस्य कार्यकारणीमध्ये हर्षवर्धन देशमुख यांच्या प्रगती पॅनलने आठ जागा जिंकल्या. केवळ एक जागा प्रतिस्पर्धी विकास पॅनलच्या वाट्याला गेली.
हर्षवर्धन यांना ३८९ मते मिळाली. तर, त्यांचे प्रतिस्पर्धी नरेशचंद्र ठाकरे यांना २७२ मते मिळाली. कार्यकारिणीच्या चार सदस्यांसाठी एकूण १० जण मैदानात होते. त्यापैकी हेमंत काळमेघ (४९०), केशवराव गावंडे (३८७), सुरेश खोटरे (३३१) व सुभाष बनसोड विजयी झाले. पराभूत सहा उमेदवारांमध्ये दिनकर गायगोले, सुरेंद्र आडे, रमेश हिंगणकर, आनंद देशमुख, प्राध्यापक प्रमोद झाडे व नरहरपत होले यांचा समावेश आहे.
श्री शिवाजी शारीरिक शिक्षण महाविद्यालयाच्या सभागृहात सायंकाळी साडेसात वाजता मतमोजणीला प्रारंभ झाला. निकालानुसार उपाध्यक्षपदाच्या निवडणुकीत सर्वाधिक ३९२ मते अॅड. गजानन पुंडकर तर दुसऱ्या क्रमांकाची ३१८ मते अॅड. जयवंत ऊर्फ भैय्यासाहेब पाटील पुसदेकर यांना मिळाली. २९५ मते घेऊन विकास पॅनलचे केशव मेतकर उपाध्यक्षाच्या तिसऱ्या पदावर विजयी झाले.