पालघर जिल्हा प्रशासनाचा मनाई आदेश वादात

ठाणे : पालघर जिल्ह्यातील वाढवण बंदर उभारणी हा देशाचे पंतप्रधान नरेंद्र मोदी यांचा महत्त्वाकांक्षी प्रकल्प आहे. वाढवण येथील समुद्र किनारी पाच हजार एकरवर भराव करून महाकाय बंदर उभारले जाणार आहे. या विरोधात वाढवण बंदर विरोधी संघर्ष समिती तसेच पालघर जिल्ह्यातील अनेक संघटना, मासेमारी संघटना मागील अनेक वर्षांपासून लढा देत आहेत.या पार्श्वभूमीवर राज्यात सत्तांतर होऊन मुख्यमंत्रीपदी एकनाथ शिंदे स्थानापन्न होताच मंगळवारी ५ जुलै रोजी पालघर जिल्हा प्रशासनाने वादग्रस्त मनाई आदेश काढला. या आदेशाविरुद्ध सर्वत्र संताप व्यक्त होऊ लागला. अखेर, जनक्षोभाच्या धास्तीने हा मनाई आदेशच रद्द करण्याची नामुष्की प्रशासनावर ओढवली आहे.