डीजीसीएने स्पाइसजेटला बजावली कारणे दाखवा नोटीस

गेल्या १८ दिवसात उद्भवल्या ८ समस्या

    06-Jul-2022
Total Views |
DGCA
 
 
 
 
 
नवी दिल्ली: विमान वाहतूक नियामक 'डीजीसीए'ने बुधवारी दि. ०६ रोजी स्पाइसजेटला कारणे दाखवा नोटीस जारी केली. गेल्या १८ दिवसांत आठ तांत्रिक बिघाडाच्या घटनांनंतर ही नोटीस जारी केली आहे. डीजीसीएने निवेदनात म्हटले आहे की स्पाईसजेट विमान नियम १९३७च्या नियम १३४ आणि शेड्यूल इलेव्हनच्या अटींनुसार सुरक्षित, कार्यक्षम आणि विश्वासार्ह हवाई सेवा प्रस्थापित करण्यात अयशस्वी ठरली आहे. डीजीसीएने स्पाईसजेटवर कारवाई का करू नये हे स्पष्ट करण्यास सांगितले आहे.
 
 
या नोटिशीला उत्तर देण्यासाठी विमान वाहतूक नियामकाने स्पाइसजेटला तीन आठवड्यांची मुदत दिली आहे. "घटनांच्‍या पुनरावलोकनातून असे दिसून येते की अंतर्गत सुरक्षा पर्यवेक्षण खराब आहे. आणि विमानांच्या देखभाल कृती देखील अपुऱ्या आहेत. बहुतेक घटना सिस्‍टम-संबंधित अपयशाशी संबंधित आहेत, त्‍यामुळे सुरक्षेचे मार्जिन खालावले आहे, असे या नोटीसमध्ये म्हटले आहे.
 
 
प्रवाशांची सुरक्षा सर्वोपरि असल्याचे विमान वाहतूक मंत्री ज्योतिरादित्य सिंदिया म्हणाले. "सुरक्षेला बाधा आणणारी अगदी लहान त्रुटी देखील पूर्णपणे तपासली जाईल आणि निश्चितपणे दुरुस्त केली जाईल,” असे त्यांनी ट्विटमध्ये म्हटले आहे. सप्टेंबर २०२१ मध्ये डीजीसीएने केलेल्या आर्थिक मूल्यांकनातून हे देखील उघड झाले आहे की स्पाइसजेट ही एअरलाइन 'कॅश-अँड-कॅरी' मॉडेलवर काम करत होती. यामुळे पुरवठादारांना नियमितपणे पैसे दिले जात नव्हते. परिणामी स्पेअर पार्टसची कमतरता भासत होती.
 
 
दि. 5 जुलै रोजी, कांडला आणि मुंबई दरम्यान कार्यरत असलेल्या स्पाईसजेट क्यू 400 विमानाचे विंडशील्ड उड्डाणाच्या मध्यभागी क्रॅक झाल्याने आपत्कालीन लँडिंग करावे लागले. त्याच दिवशी अशाच दुसर्‍या घटनेत, स्पाइसजेटचे बोईंग 737 मालवाहू विमान, चीनच्या चोंगकिंगला जात असताना कोलकाता येथे परतले. विमानाने उड्डाण केल्यानंतर, हवामान रडारने काम करणे बंद केले आणि त्यानंतर पायलटने कोलकात्याला परतण्याचा निर्णय घेतला. अश्याच आठ घटना गेल्या १८ दिवसात घडल्या आहेत.
 
 
 
 
आता महाMTBच्या बातम्या आणि लेख मिळवा एका क्लिकवर. Facebook, Twitter, Instagram वर आम्हाला फॉलो करा, महाMTB You tube चॅनलला सबस्क्राईब करा. डाऊनलोड करा महाMTB App.