...म्हणून उमेश कोल्हे प्रकरणातील आरोपी शाहरुखला बदडले!

उमेश कोल्हे प्रकरणाचा तपास सध्या एनआयएकडे वर्ग करण्यात आला असून अद्याप सात जणांना अटक झाली आहे. सुत्रांनी दिलेल्या माहितीनुसार, ऑर्थर रोड तुरुंगातील सर्कल ११, बराक क्रमांक दोनमध्ये २३ जुलै रोजी कुणाला कुठल्या कारणास्तव अटक झाली याबद्दल चर्चा सुरू होती. शाहरुख पठाण उर्फ बादशाहने उमेश कोल्हे हत्या प्रकरणात अटक झाल्याचे सांगितले.

 

 

शाहरुखवर हल्ला केल्या प्रकरणी कल्पेश पटेल, हेमंत मनेरिया, अरविंद यादव, श्रावण आवण आणि संदीप जाधव यांच्याविरोधात तुरुंग अधिकारी अमोल चौरे यांच्या तक्रारीवरून पोलिसांनी भादंवि कलम १४३, १४७, १४९, ३२३ अंतर्गत तुरुंगाची शांतता भंग करणे व कैद्याच्या मनात भीती दाखल केल्या प्रकरणी पोलीस ठाण्याचे पोलीस उपनिरीक्षक स्वप्निल काकळीज यांनी गुन्हा नोंद करुन घेतला आहे.

 

या प्रकरणाची दखल घेत तुरुंग प्रशासानाने या सर्वांना बाजूच्या बराकमध्ये हलवले आहे. त्यानंतर उमेश कोल्हे प्रकरणातील धास्तावलेल्या अन्य आरोपींनी वेगळ्या तुरुंगात हलवण्याची विनंती न्यायालयात अर्जाद्वारे केली आहे, अशी माहिती संबंधित सुत्रांनी दिली.

 

नुपूर शर्मांच्या वक्तव्याचे समर्थन केले म्हणून अमरावतीतील फार्मासिस्ट उमेश कोल्हे यांची हत्या करण्यात आली. या प्रकरणाचा तपास सध्या एनआयएकडे आहे. यात आरोपी मुदस्सीर अहमद ऊर्फ सोनू रजा शेख इब्राहिम (२२), शाहरुख पठाण ऊर्फ बादशाह हिदायत खान (२५), अब्दुल तौफिक ऊर्फ नानू शेख तस्लिम (२४), शोएब खान ऊर्फ भुऱ्या साबीर खान (२२), अतिब रशीद आदिल रशीद (२२), युसूफ खान बहादूर खान (४४) तसेच सूत्रधार शेख इरफान शेख रहीम (३५) या सर्वांची एनआयएमार्फत चौकशी सुरू आहे.