आंबोलीत साकारणार ‘आंबोली बायोडायव्हर्सिटी सेंटर’

 

 

 

 

जगाच्या नकाशावर आंबोलीला एका क्लिकवर ‘आंबोली टुरिझम’मार्फत निर्णय राऊत या युवकाने उपलब्ध करत तेथे बारमाही विविध पर्यटन सेवा सुरू केली. त्यानंतर आता आंबोली परिसरातील महत्त्वपूर्ण जैवविविधता पाहता त्याच्या संवर्धनासाठी तसेच सर्व निसर्गप्रेमी, अभ्यासक आदी सर्वांसाठी ‘आंबोली टुरिझम’मार्फत लवकरच आगळेवेगळे असे पहिलेच ‘आंबोली बायोडायव्हर्सिटी सेंटर’ सुरू करण्यात येणार आहे. सदर ‘आंबोली बायोडायव्हर्सिटी सेंटर’ सर्वांसाठी उपलब्ध असणार असल्याची माहिती ‘आंबोली टुरिझम’चे निर्णय राऊत यांनी दिली आहे. त्यामुळे असंख्य निसर्गप्रेमी व अभ्यासक यांना आंबोली परिसरातील जैवविविधतेची पर्वणीच मिळणार आहे. तसेच ‘आंबोली बायोडायव्हर्सिटी सेंटर’ हा कोकणातील तसेच पश्चिम घाटातील पहिलाच उपक्रम ठरण्याची शक्यता आहे.

 

 

 

 

निसर्गाची देणगी लाभलेल्या आंबोली परिसराची वेगळी ओळख निर्माण व्हावी तसेच, 12 महिने सर्व प्रकारच्या पर्यटनासह निसर्ग अभ्यासक व आदींना आंबोली परिसरात सर्व काही उपलब्ध व्हावे, यासाठी निर्णय राऊत यांना आपण नेहमीच धडपड करताना पाहू शकतो. निर्णय राऊत याने ‘आंबोली टुरिझम’मार्फत आंबोलीत बाराही महिने पर्यटन होते, हेही सिद्ध केले असून साहसी पर्यटन, वाईल्ड लाईफ, सफारी, टेंट कॅम्पिंग, नेचर इव्हेंट्स आदींचा यशस्वी पाया रोवला. मागील वर्षी कोरोनामुळे पर्यटन बंद असल्याने ‘आंबोली टुरिझम लाईव्ह’ संकल्पना राबवत वर्षा पर्यटन असंख्य पर्यटकांना ‘आंबोली टुरिझम’ वेबसाईट, सोशल मीडियामार्फत आंबोली दर्शन घडवून आणले होते.

 

 

 

 

पश्चिम घाटातील जैवविविधतेत आंबोली परिसर हा सर्वात महत्त्वाचा समजला जातो. दुर्मीळ तसेच अतिदुर्मीळ जैवविविधतेतील घटक आंबोली परिसरात आढळतात. गेली काही वर्षे येथील जैवविविधतेला निसर्गप्रेमींची पसंती पाहता आंबोली परिसरातील जैवविविधता तथा परिसरातील गावांचे हित सुरक्षित राहावे, यासाठी जैवविविधता संवर्धनासह अवैध प्रकार टाळण्यासाठी सोबत येथील जैवविविधता सर्वांना खुली करण्यासाठी विशेष ‘आंबोली टुरिझम’मार्फत ‘आंबोली बायोडायव्हर्सिटी सेंटर’ सुरू करण्यात येणार आहे. ‘आंबोली बायोडायव्हर्सिटी सेंटर’ सुरू करण्यासाठी गेली तीन वर्षे निर्णय राऊत यांचे प्रयत्न चालू होते. मात्र, 2019 च्या अतिवृष्टीमुळे एक वर्ष, तर कोरोना महामारीमुळे दोन वर्षे सदर सेंटरला विलंब झाला होता.

 

 

 

परंतु, आता ‘आंबोली बायोडायव्हर्सिटी सेंटर’ लवकरच काही महिन्यात सुरू होणार असून टप्प्याटप्प्याने त्यातील अनेक बाबी खुल्या केल्या जातील. या ‘आंबोली बायोडायव्हर्सिटी सेंटर’मध्ये जैवविविधतेतील प्रत्येक घटक विविध पद्धतीने सर्वांसाठी उपलब्ध होणार आहे. ‘आंबोली बायोडायव्हर्सिटी सेंटर’द्वारे आंबोली परिसरातील जैवविविधतेत नवनवीन संशोधन, संवर्धन करत तसेच जनजागृतीसुद्धा केली जाणार असून आंबोली परिसरातील जैवविविधतेत आढळणार्‍या तसेच नवनवीन शोध लागलेल्या सर्व घटकांची नोंद अधिकृतरित्या केली जाणार आहे, जी सर्वांसाठी खुली असणार आहे. आणि बरंच काही... तर यासाठी सर्व नि:स्वार्थी, निसर्गप्रेमी तथा अभ्यासकांचे सहकार्यदेखील लागणार असून सहकार्य करणार्‍या निसर्गप्रेमी तथा अभ्यासकांना पुढे येण्याचेही आवाहन निर्णय राऊत यांनी केलेले आहे.

 

 

 

 

दरम्यान, आंबोली परिसरातील जैवविविधतेत उल्लेखनीय काम करणार्‍या अभ्यासकांसह निसर्गप्रेमींच्याही कामगिरीलाही स्थान देण्यात येणार आहे, असेही निर्णय राऊत यांनी स्पष्ट केले आहे. ‘आंबोली टुरिझम’मार्फत सुरू होणारे ‘आंबोली बायोडायव्हर्सिटी सेंटर’ आंबोलीच्या पर्यटन विकासात तसेच नैसर्गिक महत्त्वात मोलाचे पाऊल ठरेल, असे उद्गार काढत निर्णय राऊत आणि त्यांच्या टीमला ‘आंबोली बायोडायव्हर्सिटी सेंटर’साठी शुभेच्छाही देत आहेत.