का घेतली तारक मेहतांनी कार्यक्रमातून एग्झिट?

 

 

 

 

गेली अनेक वर्षे प्रेक्षकांच्या मनावर अधिराज्य करणाऱ्या ‘तारक मेहता का उल्टा चष्मा’ या मालिकेतून दयाबेन म्हणजेच दिशा वकानी, 'मिसेस.तारक मेहता' ही भूमिका साकारणारी नेहा मेहता यांनी प्रोडक्शन हाउससोबत झालेल्या मतभेदांमुळे मालिका सोडल्या नंतर ‘तारक मेहता’ ही भूमिका साकारणारे शैलेश लोढा देखील आता या मालिकेला रामराम ठोकणार आहेत. सध्याच्या आपल्या ट्रॅकविषयी खूश नाही, तसेच प्रोडक्शनहाउस सोबतदेखील आपल्या शुटींगच्या तारखा व कामाच्या तासांवरून त्यांचे वाद सुरु आहेत, अशी चर्चा ऐकू येत आहे.

 

 

 

एकीकडे मालिकेचे निर्माते असित मोदी म्हणतात की, ‘शैलेश लोढा मालिका सोडणार या बातमीत फारसे तथ्य नाही’ त्याचबरोबर त्यांनी एका इंग्रजी वेबसाईटशी बातचीत करताना स्पष्ट केलं आहे की,''माझ्या मालिकेत सगळे कलाकार गेल्या दहा वर्षांपासून काम करीत आहेत. आणि शैलेश लोढा मालिका सोडत आहेत असं मला सांगितलं गेलेलं नाही किंवा अशी बातमी माझ्या कानावर देखील आलेली नाही. जर मला याविषयी काही कळालं तर मी नक्कीच सांगेन. सध्या आम्ही फक्त आमची मालिका प्रेक्षकांना अधिकधिक कशी आवडेल यावर लक्ष्य केंद्रित करीत आहोत''.

 

 

 

आणखी एका सूत्राकडून कळत आहे की,''गेल्या काही आठवड्यांपासून शैलेश लोढा यांच्यावर एकही ट्रॅक मालिकेत दिसला नाही. कारण त्यांनी काही दिवसांपासून मालिकेसाठी शूटिंग करणं थांबवलं आहे. पण यावरनं हे कन्फर्म सांगू शकत नाही की ते मालिका सोडत आहेत की नाही. पण नक्कीच शैलेश लोढा आणि प्रॉडक्शन हाऊसमध्ये शीतयुद्ध सुरु आहे. ज्यावर शांतपणे बोलून तोडगा काढण्याचा प्रयत्न सुरू आहे. जेव्हा तुम्ही एकाच मालिकेत १० वर्ष काम करता तेव्हा मतभेद होतातच. आणि ही अगदी सर्वसामान्य गोष्ट आहे. पण याचा अर्थ असा नाही की ते मतभेद संपणार नाहीत''. त्यामुळे शैलेश लोढा मालिका सोडणार की नाही हे अजून नक्की नाही.