जहांगीरपुरीमधली दंगल म्हणजे कट्टरतावाद्यांचा राज्यघटनेवर हल्ला - अॅड. मोनिका अरोरा

 

 

 

नवी दिल्ली, विशेष प्रतिनिधी : दिल्लीतील जहांगीरपुरीमध्ये घडविण्यात आलेली दंगल ही कट्टरतावाद्यांनी भारतीय राज्यघटनेवर केलेला हल्ला आहे. दिल्लीमध्ये बेकायदेशीर बांग्लादेशी आणि रोहिंग्या घुसखोरांमुळे जागोजागी टाईमबॉम्ब पेरले गेले आहेत. त्यामुळे या कट्टरतावादाविरोधात लढावेच लागेल, असे प्रतिपादन अॅडव्होकेट मोनिका अरोरा यांनी सोमवारी केले.

 

 

दिल्लीस्थित ‘ग्रुप ऑफ इंटेलेक्चुअल्स अँड अॅकेडेमिशियन्स’तर्फे जहांगीपुरी दंगलीविषय़ी सत्यशोधन अहवाल प्रकाशित करण्यात आला. यावेळी ‘ग्रुप ऑफ इंटेलेक्चुअल्स अँड अॅकेडेमिशियन्स’च्या संयोजन अॅडव्होकेट मोनिका अरोरा म्हणाल्या, दिल्लीमध्ये हनुमान जयंतीदिनी घडविण्यात आलेली दंगल, त्याचवेळी देशभरात झालेल्या दंगली आणि दिल्लीमध्येच २०२० साली घडविण्यात आलेली दंगल यांचा एकसमान पॅटर्न तयार झाला आहे. हिंदूबहुल भागांमध्ये जाणीवपूर्वक बेकायदेशीर वस्त्या वसविणे आणि तेथे बांगलादेशी व रोहिंग्या घुसखोरांना आश्रय दिला जातो. दिल्लीमध्ये झालेल्या दोन्ही दंगलींमध्ये अशाच ठिकाणांहून हिंसाचारास प्रारंभ झाला असल्याचे अरोरा यांनी सांगितले.

 

 

 

 

जहांगीरपुरीमध्ये झालेला हल्ला हा भारतीय राज्यघटनेवरील हल्ला असल्याचे अरोरा यांनी यावेळी म्हटले. त्या पुढे म्हणाल्या, अवघ्या १४ – १५ वर्षांच्या विशिष्ट धर्माच्या मुलींच्या “आमच्या रमजानच्या पवित्र महिन्यात ते हनुमान जयंती कशी साजरी करू शकतात”, असा प्रश्न विचारण्यातून धार्मिक कट्टरतावाद किती खोलवर रुजला असल्याचे स्पष्ट होते. त्याचप्रमाणे आता महिला आणि लहान मुलांना पुढे करून हिंदू समुदायावर हल्ले केले जात असल्याचेही अरोरा यांनी यावेळी नमूद केले.