छत्रपतींचा अवमान झालायं शिंदेंनी सत्तेतून बाहेर पडावं : उद्धव ठाकरे

मुंबई : राज्यपालांनी केलेल्या वक्तव्यावरुन मुख्यमंत्री एकनाथ शिंदेंनी सत्तेतून बाहेर पडावं, अशी भूमिका उद्धव बाळासाहेब ठाकरे गटप्रमुख उद्धव ठाकरेंनी घेतली. 'कुणीही यावं टपली मारुन जावं, अशी राज्याची अवस्था आहे.', अशी टीका त्यांनी कर्नाटकचे मुख्यमंत्री बसवराज बोम्मई यांनी केलेल्या वक्तव्यावर केली आहे. "ज्यांना वृद्धाश्रमातही जागा नाही, त्यांना राज्यपाल केले जात आहेत का?", असा प्रश्नही त्यांनी विचारला आहे.

राज्यपाल जे काही बोलतात ते गांभीर्याने घेण्याची गरज आहे. राज्यपालपदाचा मान मी जपतोयं पण कुणीही व्यक्ती राज्यपाल पदाची झुल पांघरली म्हणून वेडेवाकडे वक्तव्य करेल, ते महाराष्ट्र सहन करावे लागणार नाही. छत्रपती शिवाजी महाराज हे आदर्श आहेत, त्यामुळे अशी वक्तव्ये खपवून घेतले जाणार नाही. आदर्श पुसण्याचा हा प्रयत्न होतोयं. या गोष्टीचा आम्ही निषेध तर नोंदविलेलाच आहे. महाराष्ट्रातील मंत्रीमंडळ गुजरातला चाललंयं, अशी टीका त्यांनी केली.

सर्व पक्ष एकत्र येऊन याबद्दल भाजपमधील महाराष्ट्र प्रेमींनी एकत्र यावं, असेही ते म्हणाले. तसेच वेळ आली तर महाराष्ट्रही बंद पाडू, असा इशाराही त्यांनी दिला. मुख्यमंत्री एकनाथ शिंदेंवरही त्यांनी टीका केली आहे. मुख्यमंत्र्यांकडून याबद्दल काहीही अपेक्षा नाही, असेही ते म्हणाले. तसेच महाराष्ट्र प्रेमी असाल तर सत्तेतून बाहेर पडा, असे आवाहन त्यांनी केले आहे.