रोगापेक्षा इलाज भयंकर

नाशिकमध्ये नुकतीच एक भयंकर घटना घडली. ती ऐकून हसावे, रडावे की त्या व्यक्तीची किव करावी, असा प्रश्न साहजिकच आपल्या सर्वांसमोर उपस्थित होईल. नाशिकमध्ये वाढत्या थंडीमुळे सर्दी पडसे, तापाचे रुग्ण वाढले आहेत. आता हिवाळा आला की हे सर्दी-खोकला हे म्हणा ओघाने आलेच. त्यावर अनेक ‘पॅथी’द्वारे, घरगुती इलाजही आहेत. तसेच कुठल्याही डॉक्टरकडे गेल्यावर अगदी सहज आपल्याला सर्दी-खोकला थांबविण्यासाठी औषधाच्या गोळ्याही उपलब्ध होतात. मात्र, असे असताना नाशिकच्या एका प्रतिष्ठित महाविद्यालयातील उच्चशिक्षित प्राध्यापक साहेबराव दौलत निकम याने चक्क सर्दी, खोकल्यावर मात्रा म्हणून भरपूर मद्य चारचाकीमध्ये रिचवले.विशेष म्हणजे, कधीही मद्याच्या थेंबालाही हात न लावणार्‍या, कुठलेही व्यसन नसणार्‍या आणि शांत, विद्यार्थीप्रिय आणि नम्र स्वभावाच्या अशा या प्राध्यापकाने केवळ मद्यप्राशनच केले नाही, तर ते करून भरधाव वेगात गाडी चालवून वर्दळीच्या रस्त्यावर दहा जणांना एकापाठोपाठ एक धडक देऊन जखमी केले. या मद्यपी वाहनचालकाला थांबवण्यासाठी पोलिसांनी उपनगर, इंदिरानगर, अंबड, मुंबईनाका पोलिसांचे पथक गाडी थांबवण्यासाठी त्याचा पाठलाग करत होते. मात्र, त्यांनाही न जुमनता या बेभान प्राध्यापकाने तोपर्यंत 10 ते 11 जणांना आपल्या गाडीने उडवले होते.अखेर गाडीचे टायर फुटले आणि पोलिसांनी या मद्यपी प्राध्यापकाला ताब्यात घेतले. टायर फुटल्यानंतरच त्याला ताब्यात घेण्यात आले म्हणजे गाडीचा वेग किती भयंकर होता, याची कल्पना यावी. यानिमित्ताने आता प्रश्न पडतो की, नवीन पिढीला विद्यादानाचे कार्य करणार्‍या या प्राध्यापकाने मित्राच्या सांगण्यावरून सर्दी-खोकल्यावर मात्रा म्हणून मद्यसेवन करावे आणि ही गोष्ट एका उच्चविद्याविभूषित प्राध्यापकलाही कळू नये? विवेकाला इतकी नशा झिंग का यावी?हेच कृत्य कदाचित एखाद्या अशिक्षित अथवा समाजविघातक घटकाकडून झाले असते, तर त्यामागची कारणेही लक्षात आली असती. परंतु, चक्क महाविद्यालयाच्या प्राध्यापकाकडून आणि तेही सर्दी-खोकल्याचे कारण पुढे करत, हे असे भयंकर कृत्य हे केवळ नाशिक शहराचीच नाही, तर शैक्षणिक व्यवस्थेची मानही तितकीच शरमेने खाली घालणारे कृत्य म्हणावे लागेल.

 

-निल कुलकर्णी