‘सीबीआय’ चौकशीत वाझेमुळे आता कोण अडचणीत येणार?

मुंबई : मुंबई पोलीस दलातील बडतर्फ पोलीस अधिकारी सचिन वाझेची चौकशी करण्याची परवानगी ‘सीबीआय’ला मिळाली असून, लवकरच ‘सीबीआय’कडून तळोजा कारागृहात जाऊन वाझेची चौकशी केली जाणार आहे. यासाठी ‘एनआयए’ विशेष न्यायालयाकडे ‘सीबीआय’ने परवानगी मागितली होती. त्याला न्यायालयाने मंजुरी दिली आहे.          

उद्योगपती मुकेश अंबानी यांच्या घराबाहेर २५ फेब्रुवारीला एका स्कॉर्पिओत ‘जिलेटिन’च्या कांड्या व स्फोटके सापडली होती. या स्कॉर्पिओचा मालक मनसुख हिरन यांचा त्यानंतर मृतदेह आढळला होता. मनसुख हिरन यांची हत्या तपास अधिकारी सचिन वाझे याने केल्याचा आरोप मनसुख हिरन यांच्या पत्नीने केला. यानंतर ‘एनआयए’कडून सचिन वाझेला अटक करण्यात आली होती.

दरम्यान, अनिल देशमुख यांनी निलंबित पोलीस अधिकारी सचिन वाझेना १०० कोटींच्या वसुलीचे लक्ष्य दिल्याचा आरोप मुंबईचे माजी पोलीस आयुक्त परमवीर सिंह यांनी केला होता. अनेक रेस्टॉरंट आणि बारमालक तसेच इतर ठिकाणाहून पैसे जमा करण्याचे लक्ष्य देशमुखांनी वाझेला दिल्याचा आरोप सिंह यांनी केला होता. यासंदर्भात चौकशीसाठी ‘सीबीआय’ने ‘एनआयए’ न्यायालयात अर्ज करून परवानगी मागितली होती.