केरळमध्ये इस्लामी कट्टरतावाद्यांनी केली संघ स्वयंसेवकाची हत्या

केरळमध्ये इस्लामी कट्टरतावाद्यांनी केली संघ स्वयंसेवकाची हत्या

नवी दिल्ली, पार्थ कपोले : केरळमध्ये सत्तेत असलेला कम्युनिस्ट पक्ष आणि त्यांनी मोकळे रान दिलेल्या पीएफआय या मुस्लिम कट्टरतावादी संघटनेच्या सोशल डेमोक्रॅटीक पार्टी ऑफ इंडिया (एसडीपीआय) या राजकीय पक्षाच्या गुंडांनी पुन्हा एकदा राष्ट्रीय स्वयंसेवक संघाच्या स्वयंसेवकाची अतिशय निर्घृण हत्या केली आहे. दरम्यान, एरवी रा. स्व. संघ आणि भाजपवर फॅसिस्ट असल्याचा आरोप करणारी पुरोगामी मंडळींसाठी हिंदुत्ववाद्यांची हत्या ही हत्या नसतेच, अशी प्रतिक्रिया राज्यसभा सदस्य आणि भाजपचे ज्येष्ठ नेते डॉ. विनय सहस्रबुद्धे यांनी 'दैनिक मुंबई तरुण भारत'सोबत बोलताना व्यक्त केली आहे.

पीएफआय ही एक मुस्लिम कट्टरतावादी संघटना आहे. सीएएविरोधी दंगलींमध्येही या संघटनेचा सहभाग होता. केरळमध्ये एसडीपीआय हा त्यांचा राजकीय पक्ष कार्यरत आहे. भाजपचे प्रदेशाध्यक्ष के. सुंदरन आणि उत्तर प्रदेशचे मुख्यमंत्री योगी आदित्यनाथ यांनी प्रारंभ केलेल्या विजय यात्रेचा निषेध म्हणून एसडीपीआयने राज्यव्यापी निषेध आंदोलन केले. त्यांनी काढलेल्या मोर्चामध्ये प्रक्षोभक घोषणाबाजी करण्यात आली. त्याचा विरोध रा. स्व. संघाचे स्वयंसेवक आणि इतर हिंदुत्ववादी कार्यकर्त्यांनी केला असता. एसडीपीआयच्या गुंडांनी त्यांच्यावर प्राणघातक हल्ला चढविला. या हल्ल्यामध्ये रा. स्व. संघाच्या वायावर येथील शाखेचे मुख्यशिक्षक नंदू उर्फ राहुल कृष्णा यांच्यावर तीक्ष्ण शस्त्राने हल्ला चढविण्यात आला. या हल्ल्यात २२ वर्षांच्या नंदू यांचे निधन झाले. याप्रकरणी आतापर्यंत अब्दुल खदर, रियास, निशाद, अनस, अन्सिल आणि सुनील या एसडीपीआयच्या गुंडांना अटक करण्या आली आहे.

केरळमध्ये राष्ट्रीय स्वयंसेवक संघाच्या स्वयंसेवकांची हत्या करणे हा कम्युनिस्ट राजवटीचा आवडता छंद आहे. मात्र, तरीदेखील अतिशय आत्मविश्वासाने काम करणाऱ्या स्वयंसेवकांचा धसका त्यांनी घेतला आहे. त्यामुळे डावे पक्ष आणि त्यांच्या आशिर्वादावर जगणाऱ्या पीएफआय – एसडीपीआय यांनी पुन्हा एकदा संघ स्वयंसेवकाची हत्या घडविली आहे. यामुळे कम्युनिस्ट राजवटीमध्ये हिंदू सुरक्षित राहू शकत नाही, हे पुन्हा एकदा अधोरेखित झाले आहे.

हिंसेच्या आधारावरच कम्युनिस्टांचे राजकारण – डॉ. विनय सहस्रबुद्दे, राज्यसभा सदस्य

"कम्युनिस्टांनी राजकारणात नेहमीच हिंसेच्या आधारावर स्वत:साठी अवकाश निर्माण केला आहे. विचारधारेची लढाई त्यांना अमान्यच आहे आणि सहिष्णुता, विचारस्वातंत्र्य हे त्यांच्यासाठी केवळ शोभेचे शब्द असून त्यामागील भावनांशी त्यांची कोणतीही बांधिलकी नाही. त्यामुळे आतापर्यंत शेकडो स्वयंसेवकांच्या हत्या झाल्या आहेत त्यामागे हिच मानसिकता आहे. कम्युनिस्टांच्या पायाखालची जमीन आता सरकत असल्यामुळे येणाऱ्या निवडणुकीच्या काळात ही मंडळी हिंसेच्या राजकारणात मश्गुल राहतील, अशी भिती मला वाटते. त्याचप्रमाणे रा. स्व. संघाच्या स्वयंसेवकांच्या हत्यांविषयी पुरोगामी नेहमीच शांत असतात आणि हा त्यांचा दुटप्पीपणाही प्रसिद्ध आहे. त्यांच्या लेखी हिंदुत्ववादी विचारांच्या व्यक्तींची हत्या ही हत्या नसतेच. त्यामुळे त्यांच्या या दांभिकतेचा अनुभव देशाने अनेकदा घेतला आहे", अशी प्रतिक्रिया राज्यसभा सदस्य डॉ. विनय सहस्रबुद्धे यांनी व्यक्त केली आहे.

कम्युनिस्ट पक्ष आणि पीएफआयमध्ये अघोषित युती – प्रा. राकेश सिन्हा, राज्यसभा सदस्य

"स्टालिनच्या क्रौर्याची परंपराच कम्युनिस्ट पक्ष पुढे नेत असून त्यापासून ते स्वतला वेगळे करू शकत नाहीत. स्टालिनने लाखो हत्या घडविल्या होता, सोव्हिएक संघानेही त्यास अमानवी असे संबोधले होते. मात्र, माकपा त्याचे समर्थनच करते आणि त्यानुसार केरळमध्ये वैचारिक विरोधकांसोबत त्यांची वागणूक असते. रा. स्व. संघाच्या शाखेचे मुख्य शिक्षक नंदू यांची हत्या ही त्यातूनच झाली आहे. रा. स्व. संघाच्या समरसतेचा विचार आता माकप सदस्यांनाही आकर्षिक करून घेत आहे, ते सहन होत नसल्यानेच त्याचा प्रतिकार ते हिंसेच्या माध्यमातून करीत आहेत. महत्वाचे म्हणजे माकप आणि पीएफआय यांची अघोषित युती आहे. दोघेही एकमेकांची मदत घेत असताता आणि संघाविरोधात हिंसा करीत असतात. आपल्या कुशासनावरून जनतेचे लक्ष भटकविण्यासाठीदेखील मुख्यमंत्री पिनरायी विजयन हिंसेला प्रोत्साहन देत आहेत. हत्येच्या राजकारणाचे प्रमुख सूत्रधार असेही पिनरायी विजयन यांना संबोधता येईल. माकपने घटनात्मक राजकारण न केल्यास त्याची त्यांना मोठी किंमत देशभरात चुकवावी लागेल. संसदीय लोकशाहीत हिंसेला कोणतेही स्थान नाही", अशी प्रतिक्रिया राज्यसभा सदस्य प्रा. राकेश सिन्हा यांनी व्यक्त केली.