राम मंदिरासाठी आतापर्यंत सुमारे १ हजार कोटींचा निधी जमा
11 Feb 2021 11:12:47
‘श्री रामजन्मभूमी तीर्थक्षेत्र न्यास’चे विश्वस्त विश्वप्रसन्न तीर्थ महाराज यांची माहिती
बंगळुरु: अयोध्येतील राम मंदिराच्या निर्माणासाठी सुरू करण्यात आलेल्या निधी समर्पण अभियानाला देशातील नागरिकांकडून भरघोस प्रतिसाद मिळत असून आतापर्यंत सुमारे एक हजार कोटींचा निधी श्रीरामजन्मभूमी तीर्थक्षेत्र ट्रस्टकडे जमा झाल्याची माहिती ट्रस्टचे एक विश्वस्त आणि कर्नाटकातील उडुपी येथील पेजावर मठाचे मठाधिपती विश्वप्रसन्न तीर्थ महाराज यांनी बुधवार, दि. १० फेब्रुवारी रोजी दिली.
विश्वस्त विश्वप्रसन्न महाराज म्हणाले की, “जनतेने या मोहिमेला देलेल्या प्रतिसादामुळे मी खूपच आनंदी आहे. निधी गोळा करण्याच्या कामासाठी मी मोठा प्रवास केला आहे. समाजातील सर्व स्तरातील लोकांनी या प्रकल्पासाठी मदत दिली. निधीमध्ये वाढ होणे ही मंदिर निर्माणासाठी काम करणार्या संपूर्ण हिंदू समाजासाठी महत्त्वाची बाब आहे. अयोध्येत मंदिर उभारायचे आणि त्यात प्रभू रामाच्या मूर्तीची प्रतिष्ठापना करायची एवढाच न्यासाचा उद्देश नाही. पुढे जात रामराज्य म्हणजे आदर्श कल्याणकारी राज्य प्रस्थापित करण्याचे या प्रकल्पाचे अंतिम उद्दिष्ट आहे,” असे ते म्हणाले.
ते पुढे म्हणाले की, “राज्यातील सर्व मंदिरे ही संरक्षित करणे गरजेचे आहे. कारण यामुळे मंदिरांच्या जागांवर अतिक्रमण करण्याचा कोणी विचार करणार नाही आणि त्यामुळे भविष्यात वाद होणार नाहीत.”