दिल्लीतील हिंदूविरोधी दंगलीप्रकरणी शाहरुख पठाणवर आरोप निश्चित; 'हे' आहेत आरोप

दिल्ली - अतिरिक्त सत्र न्यायाधीश अमिताभ रावत यांच्या खंडपीठाने दिल्लीतील २०२० च्या हिंदूविरोधी दंगलीचा आरोपी शाहरुख पठाणवर आरोप निश्चित केले आहेत. दंगलीदरम्यान आरोपी शाहरुखने दिल्ली पोलीस हवालदार दीपक दहिया यांच्यावर गोळीबार केला होता. ईशान्य दिल्लीत ही हिंदुविरोधी दंगल झाली. शाहरुख व्यतिरिक्त न्यायालयाने कलीम अहमद, इश्तियाक मलिक उर्फ ​​गुड्डू, शमीम आणि अब्दुल शहजाद यांच्यावरही आरोप निश्चित केले आहेत. दुसरा आरोपी बाबू वसीम सध्या फरार असल्याने त्याच्यावर स्वतंत्रपणे खटला चालवला जाईल. न्यायालयाने त्याला फरार घोषित केले आहे.

बेकायदेशीर कृत्ये करणार्‍या व्यक्ती किंवा गटांच्या साध्या प्रकरणापेक्षा हे अधिक गंभीर असल्याचे नमूद करून न्यायालयाने म्हटले आहे की, "या दंगली अशा स्वरूपाच्या आहेत ज्या १९८४ च्या शीख दंगलीनंतर झाल्या नाहीत." दिल्ली पोलीस जवान दीपक दहिया यांच्या धैर्याचे आणि कर्तव्यावरील निष्ठेचे कौतुक करताना न्यायालयाने सांगितले की, दीपक यांनी धोकादायक परिस्थितीतही आरोपी पठाणचा धैर्याने सामना केला. त्यानंतरही दीपक दहिया आपल्या जागेवरून हलले नाहीत, असे न्यायालयाने म्हटले आहे. हातात फक्त काठी असताना त्यांनी बंदूक असलेल्या आरोपींचा सामना केला.

आरोपी शाहरुख पठाणच्या वकिलाने आपल्या युक्तिवादात म्हटले की, शाहरुखवर हत्येचा प्रयत्न करण्याचे कलम ३०७ लावणे योग्य नाही. यामागे त्याने असा युक्तिवाद केला की, 'एक गोळी झाडल्यानंतरही शाहरुख पठाणला कॉन्स्टेबल दहियाला मारण्याची दुसरी संधी होती, पण त्याने तसे केले नाही. यावरून पठाणचा हवालदाराला इजा करण्याचा हेतू नव्हता हे सिद्ध होते." शाहरुख पठाणच्या वकिलाचा हा युक्तिवाद न्यायालयाने ग्राह्य धरला नाही. ३०७ कलमासाठी आरोपींनी पोलिसांवर केवळ गोळीबार करणे पुरेसे आहे, असे न्यायालयाने म्हटले. हवालदाराची हत्या न करणे ही आरोपीची उदारता आहे, हे न्यायालय मानायला तयार नव्हते.

अखेर आरोपी शाहरुख पठाण याच्याविरुद्ध कलम २५ आणि २७ शस्त्रास्त्र कायदा, ३०७, १४७, १४८, १४९, १८६, १८८ आणि ३५३ नुसार आरोप निश्चित करण्यात आले. शाहरुख पठाणसोबत गुन्ह्यात भागीदार असलेल्या शमीम आणि अब्दुल शहजाद यांच्यावर भादंवि कलम ३०७ आणि शस्त्रास्त्र कायद्यानुसार गुन्हा दाखल करण्यात आला. शाहरुखला आश्रय दिल्याचा आरोप कलीम अहमदवर आय.पी सी कलम 216 अंतर्गत आरोप निश्चित करण्यात आले. CAA कायद्याच्या निषेधार्थ फेब्रुवारी २०२० मध्ये दिल्लीत हिंदूविरोधी दंगली घडवण्यात आल्या होत्या. यात दंगलखोरांनी हिंदूंची घरे, दुकाने यांना लक्ष्य करण्याबरोबरच अनेक हिंदूंची हत्या करण्यात आली होती.