केंद्रीय गृहनिर्माण व शहरी कार्यमंत्रालयाकडून दिला जाणारा ''सफाई मित्र सुरक्षा चॅलेंज पुरस्कार'' लोणावळा आणि सासवड शहराला जाहीर

    दिनांक  18-Nov-2021 23:38:58
|

Lonavla munciple corporat
 
 
पुणे : केंद्रीय गृहनिर्माण आणि शहरी कार्यमंत्रालयाद्वारे घेण्यात आलेल्या स्वच्छ सर्वेक्षण-2021 मध्ये लोणावळा आणि सासवड शहरांना सफाई मित्र सुरक्षा चॅलेंज पुरस्कार जाहीर झाला आहे. देशाचे राष्ट्रपती रामनाथ कोविंद यांच्या हस्त 20 नोव्हेंबर रोजी विज्ञान भवन, नवी दिल्ली येथे हा पुरस्कार वितरण सोहळा होणार आहे. दरम्यान पुणे जिल्ह्यातील शिरूर , जुन्नर, सासवड ,लोणावळा, इंदापूर आणि जेजुरी या शहरांनाही कचरा मुक्त शहरे म्हणून पुरस्कृत करण्यात येणार आहे. पुरस्कार जाहीर झाल्याबद्दल पुणे जिल्हाधिकारी डॉ. राजेश देशमुख यांनी संबंधित नगर परिषदांचे नगराध्यक्ष, मुख्याधिकारी, अधिकारी-कर्मचारी आणि नागरिकांचे अभिनंदन केले आहे.


या शहरांमध्ये कचरा डेपोत येणाऱ्या सुक्या कचऱ्याचे वर्गीकरण करून त्याचे पुनर्वापर करण्यात येत आहे. नगरपरिषदेमार्फत ओल्या कचऱ्यावर प्रक्रिया करून त्यापासून सेंद्रिय खत निर्मिती केली जाते. त्याचबरोबर शासनाच्या 'हरित ब्रॅण्ड' अंतर्गत शेतकऱ्यांसाठी हे खत उपलब्ध करून देण्यात येत आहे. सोबतच हागणदारी मुक्त गाव योजनेअंतर्गत 600 लाभार्थींना वैयक्तिक शौचालय बांधून देण्यात आली आहेत. सासवड नगरपरिषदेने तर शहरात 6 हजारहून अधिक वृक्षांची लागवड व जोपासना केलेली आहे. प्रदूषण कमी करण्याच्या हेतूने सणांच्या दिवसांमध्ये पर्यावरणपूरक मुर्ती निर्माल्य संकलन कृत्रिम हौद तयार करण्यात आले आहेत. या प्रकारच्या उत्कृष्ट कामगिरीमुळे या शहरांना महामहिम राष्ट्रपतींच्या हस्ते ''सफाई मित्र सुरक्षा चॅलेंज पुरस्कार'' देऊन गौरविण्यात येणार आहे.

आता महाMTBच्या बातम्या आणि लेख मिळवा एका क्लिकवर. Facebook, Twitter, Instagram वर आम्हाला फॉलो करा, महाMTB You tube चॅनलला सबस्क्राईब करा. डाऊनलोड करा महाMTB App.