दिवेआगर-कोळथरे किनाऱ्यावर सापडली कासवाची घरटी

मुंबई (अक्षय मांडवकर) - समुद्री कासव विणीच्या यंदाच्या हंगामातील कासवांची घरटी रत्नागिरीतील कोळथरे आणि रायगडमधील दिवेआगरच्या किनाऱ्यावर सापडली आहेत. या घरट्यांमध्ये कासवमित्रांना प्रत्येकी १०५ आणि १२३ अंडी आढळून आली आहेत. काही दिवसांपूर्वी हरिहरेश्वरच्या किनाऱ्यावर कासवाचे घरटे आढळले होते. येत्या काही दिवसांमध्ये सिंधुदुर्ग किनाऱ्यावरही समुद्री कासवे अंडी घालण्यासाठी येतील. 

 

 

राज्यातील रायगड, रत्नागिरी आणि सिंधुदुर्ग या तीन सागरी जिल्ह्यांमधील काही किनाऱ्यांवर दरवर्षी समुद्री कासवांमधील 'आॅलिव्ह रिडले' प्रजातीच्या माद्या अंडी घालण्यासाठी येतात. यामध्ये रायगड जिल्ह्यातील ४, रत्नागिरीमधील १३ आणि सिंधुदुर्ग जिल्ह्यातील दहा किनाऱ्यांच्या समावेश आहे. नोव्हेंबर ते मार्च हा सागरी कासवांचा विणीचा हंगाम असतो. २००३ साली चिपळूणच्या 'सह्याद्री निसर्ग मित्र' या संस्थेने वन विभागाच्या सहकार्याने सागरी कासवांच्या संवर्धन मोहिमेला सुरूवात केली. आता संवधर्नाचे हे काम वन विभाग आणि स्थानिक ग्रामपंचायतींच्या वतीने पाहिले जाते. गेल्यावर्षी सागरी कासवांच्या विणीच्या हंगामात राज्यातील तीन सागरी जिल्ह्यांमध्ये कासवांची २३३ घरटी आढळली होती.

 

 

 

यंदाच्या सागरी कासव विणीच्या हंगामातील पहिले घरटे २५ डिसेंबर रोजी हरिहरेश्वर किनाऱ्यावर सापडले होते. यामध्ये १३८ अंडी मिळाली होती. आज रायगडमधील दिवेआगरच्या किनाऱ्यावर कासवाचे घरटे मिळाल्याची माहिती श्रीवर्धनचे वनपरिक्षेत्र अधिकारी मिलिंद राऊत यांनी दिली. यामध्ये १२३ अंडी सापडली असून त्यांना सुरक्षेच्या दृष्टीने हॅचरीत हलविल्याचे त्यांनी सांगितले. तर सोमवारी दापोलीतील कोळथरे किनाऱ्यावर कासवाचे घरटे आढळून आले असून त्यामध्ये १०५ अंडी आढळल्याची माहिती दापोलीचे वनपरिक्षेत्र अधिकारी वैभव बोराटे यांनी दिले. रत्नागिरी जिल्ह्यात यंदाच्या हंगामातील हे पहिलेच घरटे असल्याचे त्यांनी सांगितले. गेल्यावर्षी रायगड जिल्ह्यातील श्रीवर्धन, मारळ, दिवेआगर आणि हरिहरेश्वर चार किनाऱ्यांवर कासवाची एकूण १५ घरटी आढळून आली होती. तर रत्नागिरीच्या १३ किनाऱ्यांवर कासवाची १५९ घरटी सापडली होती.