पौष्टिक अन् पाचक चटण्या आणि कोशिंबिरी

आपल्या विचारांचा आजूबाजूच्या परिस्थितीचा सगळ्या गोष्टींचा आपल्यावर आपल्या शरीरावर परिणाम होत असतो. शरीरामध्ये साचलेल्या अनेक गोष्टींचा निचरा होणे आवश्यक असते. कारण, या गोष्टीच आपल्या आजारपणास कारणीभूत असतात. जसे शरीरात साठलेल्या किंवा वाढ झालेल्या आवश्यक नसलेल्या पेशी या कर्करोगासारख्या आजाराला आमंत्रण देऊ शकतात, तसेच अनेक वर्षांपासून साठलेले विचार त्यांना वाट मोकळी करून दिली नाही, तर रक्तामध्ये गुठळ्या निर्माण करु शकतात. जेव्हा आपल्याला खूप राग येतो, तेव्हा आपला रक्तप्रवाह जलदगतीने होतो. याउलट भीती वाटते तेव्हा रक्त गोठत म्हणजे प्रवाह धीम्या गतीने होतो आणि दोन्ही वेळा नसा संकुचित होतात. वेळोवेळी आपल्या भावनांना मोकळे करणे खूप आवश्यक आहे. साठून राहिलेल्या भावना या मनासाठी जशा त्रासदायक असतात, तशाच त्या शरीरासही त्रास देणार्‍या असतात. आपण आज हे अनुभवत आहोत. हे सगळे ताण आपल्या शरीराच्या प्रत्येक अवयवांवर दुष्परिणाम करत असतात. म्हणून निसर्गोपचारात आहाराला महत्त्व दिले गेले आहे. आहार संतुलित असेल त्रासदायक नसेल तर मन आणि शरीर दोन्ही निरोगी राहण्यास मदत होते. आपल्याकडे प्रांतानुरुप केल्या जाणार्‍या फक्त चटण्या आणि कोशिंबिरी पाहिल्या तर त्यात विविधता दिसते, पण ज्या प्रदेशात जे धान्य पिकते तिथे सहजच पचते. जसे सोलापूर किंवा जळगावमध्ये शेंगदाण्यावर भर असतो. कारण, तिथे त्याचे उत्पादन होते. परंतु, हे प्रदेश कोरडे आहेत. त्यांना स्निग्धतेची आवश्यकता असते. त्यामुळे शेंगदाणे, तीळ यांचा आहारात समावेश असतो. तेच कोकण आणि तत्सम प्रदेशात नारळावर भर जास्त असतो, तसेच आमसूल, आंबोशी वापरायची पद्धत आहे. त्या त्या प्रदेशानुरुप शरीराची ती गरज आहे.