मुंबईकरांच्या बेपर्वाईमुळे कोरोना पुन्हा थैमान घालण्याची शक्यता

 

 

मुंबई : कोरोना प्रतिबंधासाठी पुकारण्यात आलेल्या लॉकडाऊननंतर अनलॉक सुरू होताच मुंबई कोरोना प्रतिबंधासाठी असलेल्या प्राथमिक नियमानच तिलांजली दिली जात आहे. लोक मास्कशिवाय फिरत आहेत, तर सोशल डिस्टनसिंगचाही फज्जा उडत आहे.मुंबईत आत्तापर्यंत एकूण १ लाख ४३ हजार ३८९ रुग्णांची नोंद झाली आहे. त्यापैकी ७ हजार ५९६ जणांचा मृत्यू झाला. इतर कारणांमुळे ३२२ जणांचे प्राण गेले आहेत. तर आता १९ हजार ९७१ रुग्ण कोरोनावर उपचार घेत आहेत.

 

 

कोरोनाचा संसर्ग रोखणे आणि कोरानापासून बचाव होण्यासाठी मास्क अत्यंत महत्त्वाचा ठरत आहे. त्यामुळे घराबाहेर पडल्यानंतर सार्वजनिक ठिकाणी मास्क लावणे बंधनकारक करण्यात आले आहे. काही भागात मास्क न घालता फिरणे तसेच सोशल डिस्टनसिंगचा फज्जा उडाल्याने अशा परिसरात कोरोनाची संख्या वाढली होती. याची दखल पालिका प्रशासनाने घेतली. या पार्श्वभूमीवर मास्क न घालणार्‍यांना एक हजार रुपयांचा दंड करण्याचा निर्णय पालिका आयुक्त इकबाल सिंह चहल यांच्या निर्देशानुसार घेण्यात आला आहे.

 

 

 

प्रभावी उपाययोजनांमुळे सद्यास्थितीत कोरोना नियंत्रणात आहे. मात्र मास्कविना फिरणा-यांवर सध्या कारवाई होताना दिसत नसल्याने नियंत्रणात आलेला कोरोना संसर्ग पुन्हा वाढण्याची भीती व्यक्त केली जाते आहे. त्यामुळे मास्क न घालता सार्वजनिक ठिकाणी फिरणा-यांवर प्रशासनाकडून दुर्लक्ष का केले जाते आहे, असा सवाल विचारला जातो आहे.