कष्टाचा प्रवास संपवणारी आंचल गंगवाल

आंचल गंगवाल हिचा जन्म 24 जानेवारी 1996 रोजी मध्य प्रदेशमधील निमच या गावी झाला. निमच हे गाव राजधानी भोपाळपासून 400 किमीच्या अंतरावर आहे. या गावात पायाभूत सुविधांची आधीच वानवा. शहरातील नागरिकांना अगदी सहजरित्या उपलब्ध होणार्‍या सुविधांसाठीही येथे संघर्ष करावा लागतो. मात्र, या संघर्षातून खचून न जाता त्यावर मात करत आंचलने ‘फायटर पायलट’ होण्याचे स्वप्न पाहिले आणि स्वबळावर पूर्णही केले. आंचल हिचे वडील सुरेश गंगवाल यांची एक छोटेखानी चहाची टपरी आहे. तालुका कार्यालयाबाहेर असणार्‍या या छोटेखानी चहाच्या टपरीवरच गंगवाल कुटुंबाचा उदरनिर्वाह चालत असे. चहाच्या टपरीतून मिळणार्‍या पैशांतून घर चालविताना गंगवाल कुटुंबीयांची आर्थिक ओढाताणही व्हायची.

मात्र, अशा कठीण परिस्थितीतही खचून न जाता गंगवाल यांनी आंचलला उच्चशिक्षित करण्याचे ध्येय आपल्या उराशी बाळगले आणि अपार कष्ट व आपल्या जिद्दीच्या जोरावर पूर्णही केले. आंचल ही लहानपणापासूनच शिक्षणात हुशार होती. आपल्या घरची आर्थिक परिस्थिती सुधारण्यासाठी आपल्याला उच्चशिक्षित होण्याखेरीज पर्याय नसल्याची जाण ठेवत तिने आधीपासूनच शिक्षणाकडे कटाक्षाने लक्ष दिले. माध्यमिक, उच्च माध्यमिक आणि बोर्डाच्या परीक्षांमध्ये उत्तम गुणांनी उत्तीर्ण होत तिने आपले नाव कमावले. त्यानंतर महाविद्यालयीन परीक्षांमध्येही उत्तम कामगिरी करत तिने आपली यशस्वी वाटचाल सुरुच ठेवली. वर्ष 2013 मध्ये उत्तराखंडच्या केदारनाथमध्ये आलेल्या भीषण वादळानंतर वायुसेनेचे कर्मचारी मोठ्या शौर्याने तेथील नागरिकांची मदत करत होते. ते आंचलने पाहिले आणि त्यातून प्रेरणा घेत, तिने ‘फायटर पायलट’ बनण्याचे ध्येय निश्चित केले.

गेल्या अनेक वर्षांपासून मध्य प्रदेशाच्या वाट्याला लढाऊ महिला वैमानिक होण्याचा योग आला नव्हता. मात्र, आंचल हिच्या रुपाने मध्य प्रदेशला महिला लढाऊ वैज्ञानिक मिळाली असून याबद्दल तिचे करावे तितके कौतुक कमीच. पुढील प्रवासासाठी आंचलला दै. ‘मुंबई तरुण भारत’तर्फे शुभेच्छा...!