“मुंबईतील १००० कोरोना मृत्यू अजूनही दडवलेले”

मुंबई : रुग्णालयाबाहेर झालेले; पण विविध प्राधिकरणांनी मृत्यू प्रमाणपत्र दिलेले सुमारे १००० मृत्यू अद्याप अधिकृत आकडेवारीत दाखविण्यात आलेले नाहीत. हे मृत्यूचे आकडे दडवण्याचे कारण काय, असा प्रश्न विधानसभेतील विरोधी पक्षनेते माजी मुख्यमंत्री देवेंद्र फडणवीस यांनी मुख्यमंत्री उद्धव ठाकरे यांना पत्राद्वारे केला आहे. आकडेवारीची अचूकता हाच कोरोनाविरोधातील लढाईसाठी विश्लेषणाचा मुख्य आधार असल्याने याकडे काटेकोरपणे लक्ष द्यावे, असेही फडणवीस यांनी म्हटले आहे.

 

 

देवेंद्र फडणवीस म्हणतात की, मुंबईत ज्या रुग्णांचा मृत्यू रुग्णालयाबाहेर झालेला आहे, असे मृत्यू अद्यापही दाखविण्यात आलेले नाहीत. या मृत्यूंच्या बाबतीत वॉर्ड अधिकारी किंवा तत्सम प्राधिकरणांनी मृत्यू प्रमाणपत्र दिलेले आहे, अशांचा आकडा अजूनही जाहीर करण्यात आलेला नाही. गेल्या तीन-साडेतीन महिन्यात अजूनही रेकॉर्डवर न घेतलेले किमान १००० मृत्यू मुंबईत आहेत. प्राथमिक संकलनातच आतापर्यंत किमान ४५० मृत्यू ओळखण्यात आलेले आहेत. एकूणच मृत्यूच्या संख्येत एकतर त्याच दिवशी किंवा फार तर ७२ तासांत तशी नोंद होणे आवश्यक आहे. परंतु तीन महिने लोटले तरी मृत्यू अहवाल न होता आणि ते लक्षात आल्यानंतर सुद्धा एकदम संख्या दिसू नये, या भीतीने रोज थोडे-थोडे करून ते मृत्यूसंख्येत अधिक करणे, ही अतिशय चुकीची पद्धत आहे, असेही फडणवीस यांनी म्हटले आहे.

 

 

कोरोनाविरूद्धच्या लढाईत कोणत्या आठवड्यात किती मृत्यू झाले, किती रुग्णसंख्या आढळली, म्हणजे संसर्ग किती प्रमाणात झाले आहे, हे कळण्यासाठी आकडेवारी हा अतिशय महत्त्वपूर्ण स्रोत आहे. अचूक विश्लेषणाचा तो महत्त्वपूर्ण आधार आहे. या विश्लेषणातून रणनीती आखून कोरोनाला पायबंद घालणे शक्य आहे. त्यामुळे नोंदी अचूक ठेवण्याचा आग्रह सातत्याने असला पाहिजे. नोंदणी विलंबाची पद्धत बंद करून अचूक आकडेवारी हाती येईल आणि त्याचे तत्काळ रिपोर्टिंग होईल, याचा आग्रह आपण धरला पाहिजे. त्यादिशेने योग्य त्या सूचना आपण संबंधितांना द्याव्या, असेही फडणवीस यांनी मुख्यमंत्र्यांना सुचविले आहे.

 

 

असेच एक पत्र यापूर्वी सुद्धा देवेंद्र फडणवीस यांनी मुख्यमंत्र्यांना १५ जून २०२० रोजी पाठविले होते. सुमारे ९५० मृत्यू कोरोनामुळे झालेले असताना त्यावेळी ते दाखविण्यात आलेले नव्हते. त्यानंतर १६ जून २०२० रोजी मुंबईत ८६८ आणि मुंबईसह राज्यात एकूण १३२८ मृत्यू अधिकचे दाखविण्यात आले. मुंबईत या ८६८ च्या व्यतिरिक्त सुमारे ३५० जुने मृत्यू दरम्यानच्या काळात त्यामध्ये मिळविण्यात आले. म्हणजेच असे एकूण १२०० हून अधिक मृत्यू एकट्या मुंबईतील जुने, परंतू नंतर दाखविण्यात आले आहेत.