कोकणासाठी शक्य तितकी मदत करणार : देवेंद्र फडणवीस

मुंबई : कोकणातील निसर्ग चक्रीवादळग्रस्तांना भाजपच्या वतीने जितकी मदत करता येणे शक्य आहे. तितकी आम्ही करणार आहोत, पण यासाठी शासनाने पुढाकार घेणे आवश्यक आहे. सरकारने मदत जाहीर केली पण ती कागदावरच आहे. एकही उपाययोजना जमिनीवर सुरू झालेली नाही, असे विधानसभेतील विरोधी पक्षनेते देवेंद्र फडणवीस यांनी सांगितले. आपल्या दोन दिवसांच्या दौर्‍यानंतर दापोली येथे पत्रकारांशी त्यांनी संवाद साधला. यावेळी संपूर्ण दौऱ्यात त्यांच्याबरोबर असणारे विधानपरिषदेतील विरोधी पक्षनेते प्रवीण दरेकर, माजी मंत्री रवींद्र चव्हाण, निलेश राणे, प्रसाद लाड, निरंजन डावखरे इत्यादी उपस्थित होते. 

या मदतीला विलंब झाला तर काहीच उपयोग नाही. वीजव्यवस्था पूर्वपदावर आणणे हे अतिशय आवश्यक आहे. रेशनचे अन्नधान्य तात्काळ मिळेल, याची व्यवस्था केली पाहिजे. आज दुर्दैवाने मदतीत संवेदनशीलता दिसून येत नाही. राजकीय नेतृत्वाने थोडे अधिक लक्ष दिले पाहिजे. आजची मदत कागदावर आहे. एकही उपाययोजना जमिनीवर सुरू झालेली नाही. सुका चारा उपलब्ध नाही. त्याकडेही राज्य सरकारने तातडीने लक्ष देण्याची गरज आहे, असेही देवेंद्र फडणवीस यांनी यावेळी सांगितले.