बॉलिवूड अभिनेता इरफान खान याचे निधन

मुंबई : बॉलिवूड अभिनेता इरफान खान याचे निधन झाले आहे. वयाच्या ५४ व्या वर्षी मुंबई मधील कोलिकाबेन धीरुभाई अंबानी रुग्णालयात त्याने अखेरचा श्वास घेतला. इरफानच्या जाण्याने संपूर्ण चित्रपटसृष्टीवर दुःखाचा डोंगर कोसळला आहे. काल त्याला प्रकृती अस्वाथामुळे कोलिकाबेन धीरुभाई अंबानी रुग्णालयात दाखल करण्यात आले होते. कोलन इंफेक्शन झाल्याची प्राथमिक माहिती समोर आली आहे. २०१८ मध्ये इरफान खान याला न्यूरोएन्डोक्राईन ट्युमरचे निदान झाले होते. त्यानंतर युके मध्ये त्याच्यावर उपचार सुरु होते. इरफान खान यांच्या प्रकृती अस्वस्थामुळे इंग्रेजी मिडियम या सिनेमाच्या प्रमोशनलाही त्याने हजेरी लावली नव्हती.

त्याच्यावर मागील अनेक दिवसांपासून उपचार सुरु होते. मात्र, कोरोनाच्या पार्श्वभूमीवर सुरु असलेल्या लॉकडाऊनमध्ये मंगळवारी सकाळी त्याची तब्येत अचनाक बिघडली. यानंतर त्याला मुंबईतील कोकिळा बेन रुग्णालयात दाखल करण्यात आले होते. प्रकृती गंभीर असल्याने त्याला आयसीयूमध्ये दाखल करण्यात आले होते. लॉकडाऊनमुळे लागू असलेल्या निर्बंधांमुळे त्याच्या या नियमित उपचारांमध्ये अडथळा तयार होत होता. दरम्यान, नुकतेच इरफान खानच्या आई सईदा बेगम यांचे निधन झाले होते. त्यावेळी लॉकडाऊनमुळे त्याला आईच्या अंत्यसंस्कारासाठीही जाता आले नव्हते. त्यावेळी इरफानने व्हिडीओ कॉन्फरन्सिंगद्वारे आईचे अंतिम दर्शन घेतले होते.