झूम मिटिंग प्लॅटफॉर्म सुरक्षित आहे का ? केंद्रीय गृह मंत्रालयाची सूचनावली

‘कॉम्प्यूटर इमर्जन्सी रिस्पॉन्स टीम ऑफ इंडिया’ (सीईआरटी) या राष्ट्रीय सायबर सुरक्षा एजन्सीने ‘झूम’ अॅपबाबत धोक्याचा इशारा दिला होता. त्यानंतर गृह मंत्रालयाने तातडीची पावले उचलली गेली. खाजगी वापरासाठी अद्यापही या मंचाचा वापर करणाऱ्या व्यक्तींच्या सुरक्षेसाठी केंद्रीय गृहमंत्रालयाने काही मार्गदर्शक तत्वे जारी केली. ‘झूम’ अॅपवरील कॉन्फरन्स रुममध्ये अज्ञात व्यक्तींना प्रवेश न देणे, पासवर्ड वापरुन हॅकर्सपासून सावध राहणे अशी काळजी घेण्यास वापरकर्त्यांना सांगण्यात आले आहे. गुन्हेगारांना कार्यालयीन कामकाजाची संवेदनशील माहिती मिळण्याचा धोका व्यक्त केला जात आहे.





झूम, मायक्रोसॉफ्ट टीम्स फॉर एजुकेशन, स्लॅक, सिस्को वेबएक्स असे ऑनलाइन कम्युनिकेशन प्लॅटफॉर्म मीटिंग आणि वेबिनारसाठी वापरले जात असल्याकडे ‘सीईआरटी’ने याकडे लक्ष वेधले. सरकारच्या सायबर कोऑर्डिनेशन सेंटर म्हणजेच ‘सायकॉर्ड’ने जारी केलेली ही नवी सूचनावली खासगी क्षेत्रातील नोकरदार किंवा वैयक्तिक अॅपधारक (मित्र आणि नातेवाईकांना व्हिडिओ कॉल) करणाऱ्यांसाठी आहे. कारण सरकारी व्हिडिओ कॉन्फरन्ससाठी एनआयसी (राष्ट्रीय माहिती केंद्र) हा प्लॅटफॉर्म बहुतेकदा वापरला जात असल्याचे अधिकाऱ्यांनी सांगितले.शासकीय अधिकार्‍यांना बैठक आयोजित करण्यासाठी कोणतेही ‘थर्ड पार्टी अ‍ॅप’ किंवा सेवा न वापरण्याच्या सूचना आहेत.